Ijtimoiy tarmoqlarda Toshkent metropolitenining yangi qurilgan yerusti metro liniyalaridagi kamchiliklar aks etgan suratlar va videolar tarqaldi. Shu sababli jamoatchilik metro liniyalarining mustahkamligi borasida tashvish bildirmoqda.
Tarqalgan videolarning birida Do‘stlik—Qo‘yliq yo‘nalishidagi yerusti metrosi poyezdlari harakatlanishi uchun qurilgan ko‘priksimon yo‘lni ushlab turgan ustunlar hali ishga tushmay turib darz ketgani ko‘rsatilgan.
Sergeli metro liniyasi haqida tarqalgan suratlarda esa ko‘priklarda yoriqlar borligini ko‘rish mumkin.
“O‘zbekiston temir yo‘llari” rasmiy munosabatida bu borada xavotirga o‘rin yo‘qligini ta’kidlagan va muhokamada ishtirok etganlarning o‘z fuqarolik pozitsiyasini bildirib, vaziyatga befarq bo‘lmaganiga minnatdorchilik izhor etdi.
Qayd etilishicha, O‘zbekiston hududidagi har bir obyekt qurilish sifati ustidan davlat, idoraviy, mualliflik va jamoatchilik nazoratining ko‘p bosqichli va juda samarali tizimi mavjud. Suratlarda tasvirlangan holat metro tuzilishining yuk ko‘tarish qobiliyatiga yoki mustahkamligiga ta’sir qilmaydi.
“Suratlarda ko‘rsatilgan yoriqlar kuch xususiyatiga ega emas, balki montaj ishlari davomida paydo bo‘ladi va tabiiyki, ular pardozlash ishlari davomida bartaraf etiladi”, — deyilgan “O‘zbekiston temir yo‘llari” munosabatida.
Avvalroq Toshkent metrosining Do‘stlik–Qo‘yliq uchastkasida 6 ta bekat qurib bitkazilgani xabar berilgan edi.
Izoh (0)