Bugungi kunda Toshkent ko‘chalarida yosh-u qarining niqob taqib yurganini ko‘rish mumkin. “Daryo” fotomuxbiri Madina Nurman o‘zbekistonliklarning koronavirus bilan kurashayotgani aks etgan fotojamlanma tayyorladi.
Xitoyning Uxan shahrida tarqalgan koronavirus tufayli O‘zbekistonda tibbiy niqoblar savdosi avjiga chiqdi. Ijtimoiy tarmoqlar foydalanuvchilarining yozishicha, aksariyat dorixonalarda tibbiy niqob tugab qolgan, borlari esa odatdagi narxdan qimmat sotilmoqda.
Ma’lumot uchun, Xitoyda yangi turdagi 2019-nCoV koronavirusi bilan kasallanganlar soni 24,3 mingga yetdi. Kasallik oqibatida vafot etganlar esa 490 kishini tashkil etmoqda. Jahon sog‘liqni saqlash tashkilotining ma’lum qilishicha, yangi turdagi koronavirusning tarqalishiga qarshi kurashish uchun yaqin uch oyda 61,5 million dollar kerak bo‘ladi. Xitoylik virusologlar atipik pnevmoniyaga qarshi vaksina 2019-nCoV koronavirusini to‘xtatishi mumkinligini aytdi.
O‘zbekiston 4-fevral, seshanba kuni, Xitoydan 250 nafar fuqarosini evakuatsiya qildi. Ularda koronavirus aniqlanmadi. 5-fevral, chorshanba kuni, murakkab epidemik vaziyat hukm surayotgan Uxan shahridan yana 84 nafar O‘zbekiston fuqarosi olib kelindi.
Izoh (0)