Andijonlik Jasurbek Hamroqulov Andijon shahar 6-son IIB profilaktika inspektori Sardor Abdumannopov tomonidan 2019-yil 11-sentabr kun IIB binosida kaltaklangani haqida xabar berilgan edi. O‘zbekiston Ichki ishlar vazirligi mazkur holat yuzasidan ma’lumot berdi.
Vazirlik tomonidan ma’lum qilinishicha, mazkur holat bo‘yicha ma’lumot joriy yilning 13-yanvar kuni Facebook ijtimoiy tarmog‘iga joylangan bo‘lib, unga Andijon viloyati IIB axborot xizmati tomonidan munosabat bildirilgan.
Andijon viloyati IIB axborot xizmatining ma’lumotiga ko‘ra, 2019-yilning 11-sentabrida soat chamasi 22:30 da Andijon shahrida yashovchi Jasurbek Hamroqulov Andijon shahri Nodira ko‘chasida joylashgan “Kamelot” kafesi oldida mast holatda fuqaro O.B. bilan sababsiz janjallashib, unga yengil tan jarohati yetkazgan.
Chaqiruvga ko‘ra, tungi vaqtda xizmat olib borayotgan Andijon shahri ichki ishlar organlari faoliyatini muvofiqlashtirish boshqarmasining 6-sonli ichki ishlar bo‘limi profilaktika inspektori Sardor Abdumannopov voqea joyiga yetib kelgan. Inspektor jamoat tartibini buzayotgan Jasurbek Hamroqulovni tinchlantirishga uringan vaqtida faol qarshilikka uchragan, deyiladi vazirlik xabarida.
Qayd etilishicha, shundan so‘ng, fuqaro Jasurbek Hamroqulov hududiy ichki ishlar bo‘limiga olib kelinib, belgilangan tartibda ro‘yxatdan o‘tkazilgan. Mast holatda bo‘lgan Jasurbek Hamroqulov bu yerda ham xodimlarga faol qarshilik ko‘rsatgan. Vazirlikning ma’lum qilishicha, e’lon qilingan videotasvirda aynan shu holat aks etgan.
Mazkur holat Andijon viloyatining prokuratura organlari tomonidan atroflicha o‘rganib chiqilib, Jasurbek Hamroqulovga nisbatan O‘zbekiston Respublikasi Jinoyat kodeksining 219-moddasi 1-qismi (Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) va 277-moddasi 2-qismi (Bezorilik) bilan ayb e’lon qilingan. Hozirda jinoyat ishi O‘zbekiston Respublikasi Jinoyat protsessual kodeksining 388-moddasi tartibida sud muhokamasiga yuborilgan.
Eslatib o‘tamiz, Qashqadaryo viloyatining Chiroqchi tumanida mol o‘g‘irlashda gumon qilingan 32 yoshli erkak IIB xodimlari tomonidan kaltaklanishi oqibatida 23-yanvar kuni vafot etgan edi. Keyinroq IIBning boshqa xodimlari ushbu jinoyatni yashirish maqsadida guvohlarga bosim o‘tkazgani ma’lum bo‘lgandi. Mazkur holat yuzasidan jinoyat ishi ochilib, ikki nafar IIB xodimi qamoqqa olingani, ularga nisbatan jinoyat ishi ochilgani hamda ulardan biri IIB boshlig‘i ekanligi haqida xabar berilgan edi.
Mazkur voqealar ortidan Qashqadaryo viloyat IIB boshlig‘ining birinchi o‘rinbosari Samad Turdiyev o‘z lavozimidan ketgan.
O‘zbekiston Senati Chiroqchidagi mazkur qotillikning tergovi bosh prokuror tomonidan nazoratga olinganini ma’lum qildi.
Mazkur ayanchli voqea yuzasidan Qashqadaryo viloyati IIB binosida ommaviy axborot vositalari xodimlari uchun o‘tkazilgan maxsus brifingda O‘zbekiston ichki ishlar vaziri matbuot kotibi Shohrux G‘iyosov IIB binosida odam o‘limi holati yangilik emasligini ta’kidlab o‘tgan.
Izoh (0)