O‘zbekiston Iqtisodiyot va sanoat vazirligi hamda Davlat statistika qo'mitasining mamlakat yalpi ichki mahsuloti hajmini hisoblash bo‘yicha ko‘rsatkichlari farq qilmoqda. Bunga Spot e’tibor qaratdi.
Qayd etilishicha, odatda, Davlat statistika qo‘mitasi ushbu ma’lumotlarni taqdim etadi, ammo bu yil vazirlik ham o‘z hisob-kitoblarini taqdim etdi. Ikkala hisobotda ham bu operativ yoki dastlabki ma’lumotlar ekanligi qayd etilganiga qaramasdan, har ikkala tashkilotning ma’lumotlari sezilarli darajada farq qilmoqda.
Vazirlikning ma’lumotlariga ko‘ra, yalpi ichki mahsulot 5,5 foizga o‘sgan, qo’mita esa o‘sish 5,6 foiz bo‘lganini ma’lum qilgan. Vazirlik hisobotida aytilishicha, dollarga nisbatan yalpi ichki mahsulot 58,3 milliard dollarni tashkil etgan, qo‘mitaning hisobotida bu ko‘rsatkich 57,9 milliard dollar miqdorida ko‘rsatilgan.
Vazirlik ma’lumotlariga ko‘ra, aholi jon boshiga YaIM 1741 dollarni, qo‘mitaga ko‘ra, 1724 dollarni tashkil qildi. 2019-yil ko‘rsatkichlari bo‘yicha farqlar nisbatan kichik bo‘lsa, 2018-yilga tegishli raqamlar mutlaqo boshqacha. Shunday qilib, vazirlikning ta’kidlashicha, 2019-yilda aholi jon boshiga YaIM 2018-yilga nisbatan 13,6 foizga o‘sgan. Qo‘mita esa mazkur o‘sish ko‘rsatkichi 3,6 foizni tashkil etganini ta’kidlamoqda. Ikki idora hisobotidagi farq 10 foizni tashkil etmoqda.
Nashrning yozishicha, statistik idora va iqtisodiyot uchun mas’ul vazirlikning hisob-kitoblarida tafovut bo‘lgan vaziyat boshqa mamlakatlarda ham mavjud. Masalan, Rossiyada “Rosstat” va Iqtisodiy rivojlanish vazirligi bir-biridan farq qiladigan o‘z raqamlarini taqdim etadi. Qoidaga ko‘ra, bu farq hisob-kitoblarda turli usullardan foydalanish bilan izohlanadi.
Izoh (0)