Ўзбекистон Иқтисодиёт ва саноат вазирлиги ҳамда Давлат статистика қўмитасининг мамлакат ялпи ички маҳсулоти ҳажмини ҳисоблаш бўйича кўрсаткичлари фарқ қилмоқда. Бунга Spot эътибор қаратди.
Қайд этилишича, одатда, Давлат статистика қўмитаси ушбу маълумотларни тақдим этади, аммо бу йил вазирлик ҳам ўз ҳисоб-китобларини тақдим этди. Иккала ҳисоботда ҳам бу оператив ёки дастлабки маълумотлар эканлиги қайд этилганига қарамасдан, ҳар иккала ташкилотнинг маълумотлари сезиларли даражада фарқ қилмоқда.
Вазирликнинг маълумотларига кўра, ялпи ички маҳсулот 5,5 фоизга ўсган, қўмита эса ўсиш 5,6 фоиз бўлганини маълум қилган. Вазирлик ҳисоботида айтилишича, долларга нисбатан ялпи ички маҳсулот 58,3 миллиард долларни ташкил этган, қўмитанинг ҳисоботида бу кўрсаткич 57,9 миллиард доллар миқдорида кўрсатилган.
Вазирлик маълумотларига кўра, аҳоли жон бошига ЯИМ 1741 долларни, қўмитага кўра, 1724 долларни ташкил қилди. 2019 йил кўрсаткичлари бўйича фарқлар нисбатан кичик бўлса, 2018 йилга тегишли рақамлар мутлақо бошқача. Шундай қилиб, вазирликнинг таъкидлашича, 2019 йилда аҳоли жон бошига ЯИМ 2018 йилга нисбатан 13,6 фоизга ўсган. Қўмита эса мазкур ўсиш кўрсаткичи 3,6 фоизни ташкил этганини таъкидламоқда. Икки идора ҳисоботидаги фарқ 10 фоизни ташкил этмоқда.
Нашрнинг ёзишича, статистик идора ва иқтисодиёт учун масъул вазирликнинг ҳисоб-китобларида тафовут бўлган вазият бошқа мамлакатларда ҳам мавжуд. Масалан, Россияда «Росстат» ва Иқтисодий ривожланиш вазирлиги бир-биридан фарқ қиладиган ўз рақамларини тақдим этади. Қоидага кўра, бу фарқ ҳисоб-китобларда турли усуллардан фойдаланиш билан изоҳланади.
Изоҳ (0)