O‘zbekiston Respublikasi Prezidentining 2017-yil 9-martdagi “O‘zbekiston Respublikasida uglevodorod xomashyosini qazib olishni yanada oshirish chora-tadbirlari to‘g‘risida”gi qarori doirasida “O‘zbekneftgaz” AJ tomonidan bir guruh OAV vakillari uchun “Andijonneft” AJga qarashli konlarga press-tur uyushtirildi.
29-yanvar, chorshanba kuni “Andijonneft” AJ boshqaruv raisi Jaloliddin Bekmurodov va mutaxassislar ishtirokida o‘tkazilgan matbuot anjumanida 2019-yil to‘rtinchi choragida amalga oshirilgan ishlar va kelgusidagi rejalar haqida ma’lumot berildi. Shuningdek, jurnalistlarni qiziqtirgan qator savollarga ham javoblar berildi.
“Ochig‘ini aytish kerak, Andijonda 2017-yilga qadar gaz umuman qazib olinmagan. Bor e’tibor va kuch faqat neft qazib olishga yo‘naltirilgan. Hattoki, o‘sha paytlarda burg‘ulanayotgan joydan gaz chiqib qolsa, bunday quduqlar yopib tashlangan va boshqa joylarda neft qazish ishlari davom ettirilgan. Buning sababi shuki, gaz yetkazishga ustuvorlik berilmagan va gaz qazib oladigan mutaxassislar juda ham kam bo‘lgan.
2017-yilda davlatimiz rahbarining sohamizga taalluqli muhim qarori imzolangach, gaz qazib olish masalasiga e’tibor kuchaydi va burg‘ulash ishlari jadallashdi. Natijada yangi gaz qatlamlari topilib, eskilarini ta’mirlash orqali gaz olish sur’atlari keskin yuqoriladi. Bugungi kunda mutaxassislarimizning malakasini doimiy ravishda oshirib borish uchun barcha choralar ko‘rilyapti.
O‘tgan yilning noyabr oyida olib borgan izlanishlarimiz davomida viloyatning Buloqboshi tumanida yangi gaz qatlamlari mavjudligi aniqlandi. Shundan so‘ng, burg‘ulash ishlariga kirishdik va jarayon mobaynida oldin burg‘ulab bo‘lingan quduqlar bo‘yicha ham izlandik. Sa’y-harakatlarimiz tufayli u yerlarda ham gaz qatlamlari borligi oydinlashdi va gaz yetkazib berishni boshladik. Buning oqibatida, kuniga 650—700 ming metr kub gaz qazib olyapmiz va barchasini aholiga yetkazyapmiz. Mazkur ko‘rsatkich 2017—2018-yillarda o‘rtacha 50 ming metr kub edi”, — dedi Jaloliddin Bekmurodov.
“Daryo” muxbiri Mirolim Isajonovning xabar berishicha, ayni paytda Andijon va Farg‘ona viloyatida 14 ta gaz qudug‘i ishlamoqda. Tahlillarga ko‘ra, andijonliklarning zangori olovga bo‘lgan ehtiyoji qish mavsumida kuniga 5 million metr kub atrofida, yozda esa bu ko‘rsatkich 600—700 ming metr kubni tashkil etadi. Chunki yoz oylarida gazga nisbatan talab pasayadi. Ammo bu gaz qazib olish hajmiga aks ta’sir ko‘rsatmaydi, ya’ni qazilgan gaz hajmi yuqoriligicha ketaveradi va odamlar ehtiyojidan ortib qolgani Xo‘jaobod tumanidagi yerosti gazni saqlash majmuasiga zaxiraga olinadi. Mavjud zaxiradagi gazni qish faslida aholiga yetkazib berish rejalashtirilgan.
“Shu kunlarda yana 3 ta quduqdan gaz qazib olish ishlari boshlanadi. Bu orqali esa viloyatimiz aholisiga sutkasiga 1 million metr kub gaz yetkazish imkoniyatiga ega bo‘lamiz.
Prezidentimiz yaqinda Oliy Majlisga yo‘llagan Murojaatnomasida geologiya sohasini yanada rivojlantirishga katta ahamiyat qaratilishini ta’kidladi. Joriy yilda istiqbolli konlarni aniqlash va mavjud zaxiralarni ko‘paytirish uchun davlat budjetidan 2 trillion so‘m mablag‘ ajratilishi aytildi. Geologiyaga bo‘lgan e’tibor bois hamda gaz qazib olish hajminining o‘sish sur’ati shu yosinda davom ettirsak, uzog‘i ikki yil ichida butun Andijon viloyati ehtiyojini viloyatdagi quduqlardan qazib chiqariladigan gaz evaziga to‘liq bajarishga erishamiz”, — dedi “Andijonneft” AJ boshqaruv raisi.
Izoh (0)