Шавкат Мирзиёев: Геологиясиз саноатни ривожлантириб бўлмайди
Президент Шавкат Мирзиёев 31 январь куни Тошкентнинг Олимлар кўчасидаги илмий-тадқиқот институтларига ташриф буюриб, янги қуриладиган Геология фанлари университети кампусига тамал тоши қўйгани ҳақида хабар берилган эди.
Шавкат Мирзиёев шу ерда илмий-тадқиқот институтлари ходимлари, олимлар, ёш тадқиқотчилар билан ҳам суҳбатлашди. Президент 30 йил аввал Ўзбекистонда геология рақобатбардош, хорижликлар тажриба ўрганадиган соҳа бўлгани, аммо ўтган даврда бу салоҳият бой берилганини таъкидлади.
«Бир пайтлар Ўзбекистонда геология анча ривожланган, рақобатбардош соҳа эди. Ҳатто бошқалар келиб, юртимиз мутахассисларидан тажриба ўрганиб кетарди. Лекин охирги ўттиз йилда бу соҳа эътибордан четда қолиб кетди. Бор салоҳиятни сақлаб қололмадик. Олимларга йўналиш, рағбат бўлмади. Замонавий кадрлар етишиб чиқмади», — деди давлат раҳбари.
Президентнинг таъкидлашича, геологик тадқиқотлар иқтисодиётнинг ҳамма соҳалари учун керак — ташхиссиз беморни операция қилиб бўлмаганидек, геологиясиз саноатни ривожлантириб бўлмайди. «Биз бугун шу соҳа ривожига асос бўладиган илм даргоҳига пойдевор қўймоқдамиз», — деди Шавкат Мирзиёев соҳа олимлари, ёш тадқиқотчилар билан бўлиб ўтган суҳбатда.
