Navoiy shahrida viloyat IIB boshlig‘i polkovnik Rustam Tursunov yoshlar bilan uchrashdi. Bu haqda IIB axborot xizmati xabar bermoqda.
Mazkur tadbirda sportchi yoshlar, vaqtincha ishsiz va kelajakda tadbirkorlik faoliyati bilan shug‘ullanishni maqsad qilgan yigit-qizlar qatnashdi.
R.Tursunov yoshlarga berilgan imkoniyat va imtiyozlar haqida to‘xtalar ekan, aynan sport bilan shug‘ullanayotgan yoshlarimizga ushbu yo‘nalishdan to‘g‘ri maqsadda foydalana bilish, shuningdek, jamoat joylarida axloq-odob qoidalariga qat’iy rioya qilish bo‘yicha fikrlarini bildirdi.
Tadbir munosabati bilan shu kuni “Ochiq eshiklar kuni” ham tashkil etilib, unda viloyatdagi korxona-tashkilot, huquqni muhofaza qiluvchi idoralar vakillari o‘zlarida mavjud bo‘sh ish o‘rinlari bilan qatnashdi.
— Sportning qo‘l jangi turi bilan salkam 10 yildan buyon shug‘ullanaman. Ichki ishlar organlarida xizmat qilish orzum, – deydi yosh sportchi Shohsanam Erkinova. — To‘g‘risi, bunday uchrashuvlarga ilk marotaba qatnashyapman. Bugun soha vakillari tomonidan menga ichki ishlar xodimi bo‘lish uchun me’yoriy talablar va kerakli hujjatlar haqida ma’lumotlar berildi.
Tadbir so‘ngida viloyat IIB rahbariyati tomonidan jamoatchilik hamda yoshlar bilan mustahkam hamkorlikni o‘rnatish, yoshlarni bir maqsad sari intilishlari uchun barcha zarur choralar ko‘rilishi borasida kelishib olindi.
Izoh (0)