Навоий шаҳрида вилоят ИИБ бошлиғи полковник Рустам Турсунов ёшлар билан учрашди. Бу ҳақда ИИБ ахборот хизмати хабар бермоқда.
Мазкур тадбирда спортчи ёшлар, вақтинча ишсиз ва келажакда тадбиркорлик фаолияти билан шуғулланишни мақсад қилган йигит-қизлар қатнашди.
Р.Турсунов ёшларга берилган имконият ва имтиёзлар ҳақида тўхталар экан, айнан спорт билан шуғулланаётган ёшларимизга ушбу йўналишдан тўғри мақсадда фойдалана билиш, шунингдек, жамоат жойларида ахлоқ-одоб қоидаларига қатъий риоя қилиш бўйича фикрларини билдирди.
Тадбир муносабати билан шу куни «Очиқ эшиклар куни» ҳам ташкил этилиб, унда вилоятдаги корхона-ташкилот, ҳуқуқни муҳофаза қилувчи идоралар вакиллари ўзларида мавжуд бўш иш ўринлари билан қатнашди.
— Спортнинг қўл жанги тури билан салкам 10 йилдан буён шуғулланаман. Ички ишлар органларида хизмат қилиш орзум, – дейди ёш спортчи Шоҳсанам Эркинова. — Тўғриси, бундай учрашувларга илк маротаба қатнашяпман. Бугун соҳа вакиллари томонидан менга ички ишлар ходими бўлиш учун меъёрий талаблар ва керакли ҳужжатлар ҳақида маълумотлар берилди.
Тадбир сўнгида вилоят ИИБ раҳбарияти томонидан жамоатчилик ҳамда ёшлар билан мустаҳкам ҳамкорликни ўрнатиш, ёшларни бир мақсад сари интилишлари учун барча зарур чоралар кўрилиши борасида келишиб олинди.
Изоҳ (0)