O‘zbekistonda issiqlik ta’minoti uchun faqatgina isitish davrida pul to‘lash taklif etildi

Uy-joy kommunal xo‘jaligi vazirligi “Issiqlik ta’minoti tizimini takomillashtirishga qaratilgan O‘zbekiston Respublikasi hukumatining ayrim qarorlariga o‘zgartirish va qo‘shimchalar kiritish to‘g‘risida”gi qarori loyihasini muhokamga qo‘ydi.

Loyihada keltirilishicha, issiqlik ta’minoti uchun yilning har oyida birdek emas, balki faqatgina isitish mavsumida pul to‘lanadi. “98-bandning ikkinchi xatboshidagi ‘kalendar’ so‘zi ‘isitish davridagi kalendar’ so‘zlari bilan almashtirilsin”, — deyiladi loyihada.

Loyihaga ko‘ra:

• iste’molchilar uchun issiqlik ta’minoti xizmatlariga tariflarni shakllantirish va belgilashda ishlab chiqarish xarajatlarini pasaytirish hamda issiqlik ta’minoti tarmoqlaridagi yo‘qotishlarni qisqartirish hisobiga issiqlik ta’minoti tizimini rivojlantirish va modernizatsiya qilish xarajatlari hisobga olinadi, shuningdek, ko‘rsatilayotgan xizmatlar tannarxini qoplash mexanizmlarini bosqichma-bosqich joriy etish nazarda tutiladi;
• aholi uchun issiqlik energiyasi va issiq suvga pasaytirilgan tariflarni qo‘llash natijasida ko‘riladigan zararlar Qoraqalpog‘iston Respublikasining respublika budjeti, viloyatlar va Toshkent shahar mahalliy budjetlari hisobidan qoplanadi.

Muhokama 5-fevralga qadar davom etadi.