2019 йилда МИБ ходимларига қаршилик кўрсатиш билан боғлиқ 132 та ҳолат аниқланиб, айбдорларга нисбатан қонуний чора кўрилди. Йил давомида ходимлар томонидан 26 та жиноий ҳолатларга йўл қўйилгани фош этилди. Ҳозирда ушбу ноқонуний хатти-ҳаракатлар юзасидан текширув ишлари олиб борилмоқда. Бу ҳақда 22 январь куни АОКАда Бош прокуратура ҳузуридаги МИБ раҳбарияти иштирокида ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Тадбирда таъкидланишича, аксарият ҳолларда Бюро фаолиятига доир маълумотларни айрим ОАВ ва ижтимоий тармоқларга жойлаштиришда объектив баҳо берилмаяпти. Баъзи шахс ёки гуруҳлар манфаати учун бир томонлама ёндошилиб, амалдаги қонунчилик талаблари инобатга олинмаяпти.
«Албатта, ҳар бир хабарга мунтазам ҳуқуқий баҳо бериб боряпмиз. Агар истеъмолчи ноҳақ бўлса, бу ҳақда унга тушунтирамиз. Тарқатилган ахборотга объектив ёндашилмаса, оммавий ахборот воситалари ва журналистларга расмий муносабатимиз ёки раддиямизни билдирамиз. Бундай вазиятларда ходимнинг хатоси ёки айби бўлса, унга ҳам муросасиз муносабат билдириб, қаътий чора кўрилади.
Ачинарлиси, тўлов қобилиятига эга фуқаролар орасида қарздорликни бартараф этиш ўрнига, ижтимоий тармоқлар орқали Бюро фаолияти ҳақида нотўғри хабарларни жойлаштиришга ҳаракат қилаётганлар ҳам йўқ эмас. Фаолиятимизга оид ҳар қандай масала бўйича аҳоли учун қисқа «1107» ишонч телефон рақами кун-у тун ишлаяпти. Ҳар бир мурожаат назоратга олинган ҳолда, атрофлича ўрганилиб, қонуний баҳо берилади. Ўз навбатида амалий ёрдам кўрсатиб, муаммоларни ҳам ҳал этиш бўйича чораларни кўрамиз», — деди МИБнинг жамоатчилик билан алоқалар ва ҳуқуқий ахборот бўлими бошлиғи Фарруҳ Тошпўлатов.
Матбуот анжуманида маълум қилинишича, Бюро органларида ходимлар томонидан содир этилаётган коррупция ва ножўя хатти-ҳаракатлар ҳам учраб турибди. МИБ ўз вазифасини суиистеъмол қилиб, тамагирлик ва пора олиш ҳолатларига қўл урган ходимларига ҳам қарши кескин курашмоқда. 2019 йилда 26 та жиноий ҳолатда МИБ вакилларининг алоқаси мавжудлиги аниқланди. 2 минг нафардан кўпроқ ходимлар касбий малака ошириш ҳамда маънавий-ахлоқий жиҳатдан тарбиялаш, профилактик ва тушунтириш тадбирларига жалб этилди.
«Тўлов интизомини мустаҳкамлаш орқали қарздорликни камайтириш, энергия тармоқларига ноқонуний уланиш, суд ва бошқа орган ҳужжатларининг ижросини таъминлаш каби вазифаларини бажариш ходимларимизга осон кечмаяпти.
Бюро ташкил этилганидан, яъни 2017 йил июнь ойидан бери иш ҳажмининг кўплиги ва оғир шароитда ишлашни ҳоҳламаган 7 минг 300 нафардан зиёд ходимлар ўз хоҳишига кўра ишдан бўшатилди.
Фуқароларимизнинг ходимларни қонуний талабини бажариш ўрнига, вазиятни ўз томонига оғдириш мақсадида қаршилик кўрсатиши туфайли 4 нафар ходим ўз вазифасини бажариш вақтида вафот этди. 200 дан ортиқ ходимларга турли даражада тан жароҳати етказилди.
Шу ўринда истеъмолчиларни энергия ресурсларидан фойдаланишга оид шартнома мажбуриятлари ва тўлов интизомига риоя қилишларини сўраб қолардик», — деди МИБ директорининг биринчи ўринбосари Ҳасан Кабиржонов.
Изоҳ (0)