Ўзбекистон ҳукумати Россиядан меҳнат муҳожирларига нисбатан амнистия сўради. Бу ҳақда, Ўзбекистон Ташқи ишлар вазирлигига яқин манбага таяниб, «Коммерсантъ» хабар бермоқда деб ёзади «Kun.uz».
«Бир неча юз минг Ўзбекистон фуқаролари Россияга кира олмаяпти, чунки улар аввал миграция қонунчилигини бузган. Россияга кейинчалик қайта киришга йўл қўйилмайди деб, ҳудудни тарк этишга қўрқиб турган худди шунча қонунбузар бор», — деб ёзади «Коммерсантъ».
Москва Тошкентни постсовет ҳудудидаги интеграцион жараёнларга, биринчи навбатда, Евросиё иқтисодий иттифоқига (ЕОИИ) жалб этишдан манфаатдор. Ўзбекистон бу иттифоққа қўшилиши мумкинлиги 2019 йилда маълум бўлганди. Тошкент бу борада ҳали якуний қарор қабул қилмаган.
Россия ташқи ишлар вазири Сергей Лавровнинг ташрифи арафасида, Ўзбекистон Президенти Администрацияси ҳузуридаги Иқтисодий тадқиқотлар ва ислоҳотлар маркази экспертлари мамлакатнинг ЕОИИга аъзо бўлишининг афзалликлари ва хавф-хатарлари тўғрисида биринчи ҳисоботни тақдим этди.
Марказ ҳисоботларига кўра, иқтисодий мақсадга мувофиқлик нуқтаи назаридан, ЕОИИда иштирок этиш Ўзбекистон бизнеси учун фойдали. «Иттифоққа кирган тақдирда, маҳаллий ишлаб чиқарувчилар бир қатор мамлакатлар бозорларига кириш бўйича тенг ҳуқуққа эга бўлишади, меҳнат муҳожирлари учун шароит яхшиланади», — деб фикр билдирган экспертлар.
Шу билан бирга, «Коммерсантъ» манбаларининг қайд этишича, Ўзбекистон иттифоқ бўйича бўлажак шерикларга ўзининг қатор тармоқлари учун имтиёзли ўтиш даврлар (баъзи ҳолларда ўн йилгача) берилиши хоҳлаётганини олдиндан билдирган.
Изоҳ (0)