Qashqadaryolik tadbirkor Feruz Qiyomov Qarshi tuman hokimi G‘ayrat Begaliyevning mas’uliyatsizligi sabab “sinish” arafasida ekanligini aytmoqda. Prezident Shavkat Mirziyoyev “Bitta tadbirkor o‘z faoliyatini to‘xtatsa ham bunga “favqulodda holat” sifatida qaralishi kerak”, deb turgan paytda tumanda tadbirkor muammosiga e’tiborsizlikni qanday baholash mumkin?
Bu haqda “Daryo”ga shikoyat qilgan tadbirkor Feruz Qiyomov hokim va’dasiga ishonib, aldanib qolganini aytib, kutubxona qurish uchun sarflagan 672 million so‘m mablag‘ini ololmay, “bankrot”lik yoqasiga kelib qolganidan nolimoqda.
— 2019-yil 15-avgust kuni tuman hokimi G‘ayrat Begaliyev topshirig‘iga ko‘ra kutubxona qurishni boshlagandim. To‘g‘ri, ishni hech qanday shartnomasiz boshladim. Ammo hokimga ishongandim. Uni bir so‘zli deb o‘ylagandim. Lekin kutubxona deyarli bitgach, pulimni bermay sarson qilmoqda, — deydi Feruz Qiyomov. – Agar tadbirkorlik, quruvchilik shunday bo‘lsa, voz kechaman bunday ishdan.
Prezidentning 2019-yil 7-iyundagi “O‘zbekiston Respublikasi aholisiga axborot-kutubxona xizmati ko‘rsatishni yanada takomillashtirish to‘g‘risida”gi qaroriga muvofiq hududlarda axborot-resurs markazlari o‘rnida axborot-kutubxonalar tashkil etilgandi. Ma’lum bo‘lishicha, tumanda yangi tashkil etilgan axborot-kutubxona binosi eskiligi sabab uni zamonaviy ko‘rinishga keltirish va qo‘shimcha bino qurish uchun tadbirkordan ko‘mak so‘ralgan. Tadbirkor esa tuman uchun nafim tegsin, deb hokimning bir og‘iz gapini yerda qoldirmay, ishni boshlab yuborgan. Ish 90-95 foizga bitgan.
— Ish bitgach, hokimni topolmay sarsonman, — deydi tadbirkor. — Qabuliga 15 marotaba bordim, 4 marotaba gaplashishga muvaffaq bo‘ldim. “Beramiz, kutib tur”, deyishdan nariga o‘tmayapti. Men esa bor pulimni tikkanman. Tadbirkorligim davom etishi kerak-ku. Menda ham tirikchilik bor. Qolaversa, qurilish uchun qilgan sarf-xarajatlarimning joyini qoplashim kerak. Boshqa ishga qo‘l urishim kerak.
Ma’lum bo‘lishicha, tadbirkor bino deyarli bitsa-da, bir so‘m ham to‘lab berilmagani sabab binoni egalariga topshirishga shoshilmayapti. Shu sabab ham axborot-kutubxona xodimlari yengil tipda qurilgan do‘konchadan qo‘nim topishgan.
— Sovuq va zax xonada o‘tirib ishlashga majbur bo‘lyapmiz, — deydi axborot-kutubxona xodimi Nargiza Primqulova. – Biz uchun qurilayotgan bino deyarli tayyor. Ammo quruvchi bermas ekan. Sababi puli to‘lab berilmagan deyishdi. O‘rtada aziyat chekayotgan biz. Sovuq xonada elektr pech ulab, zo‘rg‘a o‘tiribmiz. Bu yerga kitob o‘qishga kelgan odamni sovuq urib ketishi tayin. Shu sababdan ham kitobxonlarimiz kitoblarni olib ketadi.
Kuzatuvlarimizga ko‘ra axborot-kutubxona fondidagi 49 ming dona kitob ayni kunda chang bosgan holda qaysidir burchaklardan joy olgan. Kutubxona xodimlari joylashgan xonada xodimlarga zo‘rg‘a joy topilyapti.
Darvoqe, tadbirkor pulini so‘rab, hatto viloyat hokimi qabulida ham bo‘lgan. Zoir Mirzayev ham hozircha pul yo‘qligini, fevralda qilib berilishini aytgan. Tadbirkor esa fevralga qadar kutadigan bo‘lsa, bankrot bo‘lishi mumkinligidan qo‘rqmoqda.
Izoh (0)