Adiblar xiyobonida yana 11 shoir-yozuvchiga haykal o‘rnatiladi

Avvalroq Prezident Shavkat Mirziyoyev Adiblar xiyoboniga borgani, u yerdagi qurilish ishlari, haykallarga oid loyiha bilan tanishgani haqida xabar berilgandi. “Yozuvchilar uyushmasi”ning ma’lum qilishicha, Adiblar xiyobonida yana 11 shoir-yozuvchiga haykal o‘rnatiladi.

Xiyobon Alisher Navoiy haykali bilan uyg‘unlashtirilib, yaxlit adabiy-me’moriy shajara hosil qilishi uchun yangi loyiha ishlab chiqildi. Uning mana shu bosqichida xiyobonga 23 adibning haykali o‘rnatilishi ko‘zda tutilgan. Xususan, Navoiy, Bobur, Ogohiy, Muqimiy, Furqat, Avloniy, Behbudiy, Qodiriy, Cho‘lpon, Oybek, Hamid Olimjon va Zulfiya, Abdulla Qahhor, Said Ahmad va Saida Zunnunova, G‘afur G‘ulom, Ozod Sharafiddinov, Erkin Vohidov, Abdulla Oripov, Ibroyim Yusupov, To‘lepbergen Qayipbergenov, Aleksandr Faynberg, Muhammad Yusufning haykali bir butun ansamblni tashkil etadi.

Davlat rahbari haykallar yoniga lavhlar o‘rnatib, audioyozuvlar orqali adiblar haqida qisqacha ma’lumot berish, adabiy tadbirlar o‘tkazish uchun “She’riyat ayvoni” yaratish zarurligini aytgan.