Қашқадарёлик тадбиркор Феруз Қиёмов Қарши туман ҳокими Ғайрат Бегалиевнинг масъулиятсизлиги сабаб «синиш» арафасида эканлигини айтмоқда. Президент Шавкат Мирзиёев «Битта тадбиркор ўз фаолиятини тўхтатса ҳам бунга «фавқулодда ҳолат» сифатида қаралиши керак», деб турган пайтда туманда тадбиркор муаммосига эътиборсизликни қандай баҳолаш мумкин?
Бу ҳақда «Дарё»га шикоят қилган тадбиркор Феруз Қиёмов ҳоким ваъдасига ишониб, алданиб қолганини айтиб, кутубхона қуриш учун сарфлаган 672 миллион сўм маблағини ололмай, «банкрот»лик ёқасига келиб қолганидан нолимоқда.
— 2019 йил 15 август куни туман ҳокими Ғайрат Бегалиев топшириғига кўра кутубхона қуришни бошлагандим. Тўғри, ишни ҳеч қандай шартномасиз бошладим. Аммо ҳокимга ишонгандим. Уни бир сўзли деб ўйлагандим. Лекин кутубхона деярли битгач, пулимни бермай сарсон қилмоқда, — дейди Феруз Қиёмов. – Агар тадбиркорлик, қурувчилик шундай бўлса, воз кечаман бундай ишдан.
Президентнинг 2019 йил 7 июндаги «Ўзбекистон Республикаси аҳолисига ахборот-кутубхона хизмати кўрсатишни янада такомиллаштириш тўғрисида»ги қарорига мувофиқ ҳудудларда ахборот-ресурс марказлари ўрнида ахборот-кутубхоналар ташкил этилганди. Маълум бўлишича, туманда янги ташкил этилган ахборот-кутубхона биноси эскилиги сабаб уни замонавий кўринишга келтириш ва қўшимча бино қуриш учун тадбиркордан кўмак сўралган. Тадбиркор эса туман учун нафим тегсин, деб ҳокимнинг бир оғиз гапини ерда қолдирмай, ишни бошлаб юборган. Иш 90-95 фоизга битган.
— Иш битгач, ҳокимни тополмай сарсонман, — дейди тадбиркор. — Қабулига 15 маротаба бордим, 4 маротаба гаплашишга муваффақ бўлдим. «Берамиз, кутиб тур», дейишдан нарига ўтмаяпти. Мен эса бор пулимни тикканман. Тадбиркорлигим давом этиши керак-ку. Менда ҳам тирикчилик бор. Қолаверса, қурилиш учун қилган сарф-харажатларимнинг жойини қоплашим керак. Бошқа ишга қўл уришим керак.
Маълум бўлишича, тадбиркор бино деярли битса-да, бир сўм ҳам тўлаб берилмагани сабаб бинони эгаларига топширишга шошилмаяпти. Шу сабаб ҳам ахборот-кутубхона ходимлари енгил типда қурилган дўкончадан қўним топишган.
— Совуқ ва зах хонада ўтириб ишлашга мажбур бўляпмиз, — дейди ахборот-кутубхона ходими Наргиза Примқулова. – Биз учун қурилаётган бино деярли тайёр. Аммо қурувчи бермас экан. Сабаби пули тўлаб берилмаган дейишди. Ўртада азият чекаётган биз. Совуқ хонада электр печ улаб, зўрға ўтирибмиз. Бу ерга китоб ўқишга келган одамни совуқ уриб кетиши тайин. Шу сабабдан ҳам китобхонларимиз китобларни олиб кетади.
Кузатувларимизга кўра ахборот-кутубхона фондидаги 49 минг дона китоб айни кунда чанг босган ҳолда қайсидир бурчаклардан жой олган. Кутубхона ходимлари жойлашган хонада ходимларга зўрға жой топиляпти.
Дарвоқе, тадбиркор пулини сўраб, ҳатто вилоят ҳокими қабулида ҳам бўлган. Зоир Мирзаев ҳам ҳозирча пул йўқлигини, февралда қилиб берилишини айтган. Тадбиркор эса февралга қадар кутадиган бўлса, банкрот бўлиши мумкинлигидан қўрқмоқда.
Изоҳ (0)