Туризмни ривожлантириш давлат қўмитаси қошидаги Самарқанд «Ипак Йўли» туризм халқаро университетининг биринчи проректори Азамат Акбаров хорижда олган фалсафа доктори (PhD) илмий даража дипломи қалбаки бўлиб чиққани сабабли ишдан олинди.
13 январь, душанба куни бўлиб ўтган Ёшлар пресс-клубининг навбатдаги сессиясида Таълим сифатини назорат қилиш инспекцияси бошлиғи Улуғбек Тошкенбоев турли муҳокамаларга сабаб бўлган мазкур ҳолатга қисман ойдинлик киритди, дея хабар бермоқда «Дарё» мухбири.
«Бу масала Олий аттестация комиссияси томонидан ўрганилган. Ҳақиқатдан ҳам, унинг дипломи нотўғри берилганлиги ёки сохта эканлиги изоҳланган.
Шуни айтиш керакки, биз ҳозирги кунда олий ўқув юртларига аттестация ва аккредитацияга чиқиб, олийгоҳларни баҳолаш мобайнида шу каби масалаларга алоҳида эътибор беряпмиз», — деди Улуғбек Тошкенбоев.
Маълум қилинишича, Азамат Акбаров Burch (Босния ва Герцеговина давлати пойтахти Сараево шаҳрида жойлашган) халқаро университетидаги профессорлик фаолиятини Россия томонидан берилган диплом асосида амалга оширган. Кейин Ўзбекистонга келганида Burch университети тақдим этган диплом асосида ишга қабул қилинган. Лекин ўрганиш жараёнида аниқланишича, Burch университети берган диплом сохта бўлиб чиққан ва оқибатда Азамат Акбаров лавозимидан озод қилинган.
«Келгусида бу каби ҳолатларга йўл қўймаслик учун Олий аттестация комиссияси билан ҳамкорликда ишларни амалга оширишимиз зарур», — деди Улуғбек Тошкенбоев.
Изоҳ (0)