“Al-Quds” maxsus bo‘linmasi rahbari general Qosim Sulaymoniy o‘ldirilgan kuni amerikalik harbiylar Yamanda eronlik yana bir yuqori martabali harbiyni yo‘q qilishga uringan, deb xabar beradi The Washington Post.
Gap “Al-Quds”ning moliyaviy masalalar bo‘yicha mutaxassisi Abdul Razo Shaxaliy haqida ketmoqda. Biroq Vashington uni o‘ldirishga muvaffaq bo‘lmagan.
Ma’lumotlarga ko‘ra Abdul Razo Shaxaliyni yo‘q qilishga urinish yana amalga oshirilishi mumkin. AQSh administratsiyasining ta’kidlashicha, u Qo‘shma Shtatlar va uning ittifoqdoshlariga qarshi bir qator hujumlarga aloqador. “Ayni vaqtda operatsiya maxfiyligicha qolmoqda. Bunga amerikalik harbiylarning omadsizligi bilan bog‘liq bo‘lishi mumkin, agar Shaxaliy o‘ldirilganida AQSh bu haqda ma’lum qilgan bo‘lardi”, — deyiladi xabarda.
Eslatib o‘tamiz, Qosim Sulaymoniy 3-yanvar kuni AQSh tomonidan amalga oshirilgan aviazarbalar oqibatida halok bo‘lgandi. 8-yanvar kuni Eron AQShning Iroqdagi ikkita harbiy bazasiga hujum qildi. Shu orqali Eron hukumati Sulaymoniyning o‘ldirilishiga javob qaytardi.
Izoh (0)