Toshkent shahar tez tibbiy yordam stansiyasiga 150 ta zamonaviy Ford rusumidagi reanimobillar topshirildi. Bu haqda O‘zbekiston Sog‘liqni saqlash vazirligi xabar berdi.
Ma’lum qilinishicha, bugungi kunda poytaxt aholisiga 179 ta tez yordam brigadasi tibbiy xizmat ko‘rsatmoqda. Tizimda qariyb 900 nafar malakali shifokor, 1244 nafar feldsher va o‘rta tibbiyot xodimlari faoliyat yurityapti. Ayni paytgacha Toshkent aholisiga tez tibbiy yordam ko‘rsatishda Nissan, Hyundai, Toyota rusumli maxsus avtotransportlardan ham foydalanilayotgan edi.
Ta’kidlanishicha, jahon tibbiyotining eng so‘nggi tibbiy texnologiyalari bilan jihozlangan Ford reanimobillari chaqiriqni qabul qilishdan tortib, manzilga yetib borish, birinchi tibbiy yordam ko‘rsatish, zarur holatlarda bemorni shifoxonaga yetkazishda qator qulayliklarga ega. Bu mashinalarning salonida zamonaviy EKG, IVL, defibrilyator, so‘rg‘ich, kislorod sistemasi va boshqa zamonaviy tibbiy asbob-uskunalar, dori qutisida tez tibbiy yordam ko‘rsatish uchun zarur bo‘lgan barcha turdagi dori-darmonlar bor.
Vazirlikning xabar qilishicha, Ford’larda eng so‘nggi rusumdagi aloqa vositalari ham o‘rnatilgan. Bu imkoniyat markazdagi dispetcherlik punktida turib mashinaning joylashuv nuqtasini, yo‘llardagi harakatini va mashina salonida tibbiy yordam ko‘rsatish jarayonini bevosita kuzatishga imkon beradi. Endilikda chaqiriqqa otlangan tez yordamning yo‘llarda tirbandlikka duch kelishi, unga yo‘l berilmasligi holatlari ham mashinaga o‘rnatilgan aloqa vositalari xotirasiga yozib qolinadi.
Ushbu avtomatlashtirilgan tez tibbiy yordam xizmati boshqaruv tizimi Sog‘liqni saqlash vazirligi hamda Axborot texnologiyalari va kommunikatsiyalarini rivojlantirish vazirligi hamkorligida joriy etildi. Jumladan, mazkur tizimning joriy etilishi orqali murojaatlarni qabul qilish va ro‘yxatga olish, tegishli tez tibbiy yordam stansiyalari brigadalariga yo‘naltirish hamda chaqiriq manziliga yetib borish vaqtini keskin kamaytiradi.
Ushbu yangi tizim chaqiriqlarni nafaqat statsionar va mobil telefon vositasi orqali, balki maxsus mobil ilova orqali ham chaqirish imkonini yaratadi. Hatto nogironligi bo‘lgan shaxslar ham ushbu ilova orqali mustaqil ravishda chaqiriq berish imkoniga ega bo‘ladi. Dispetcher sanoqli soniyalar ichida chaqiriqni kompyuterda to‘liq qayd qiladi va kompyuter tizimi avtomatik ravishda ushbu chaqiriqni chaqiriq joyiga eng yaqin bo‘lgan bo‘sh brigadaga uzatadi. Tizimga integratsiya qilingan GPS-geolokatsiya funksiyasi har bir brigadaning qayerda joylashganligini va statusini ko‘rsatib turadi.
Bu tizim avtomatik ravishda dori vositalari, tibbiy buyumlar va yonilg‘i sarfini ham qayd qilib boradi. Belgilangan vaqt ichida bajarilgan chaqiriqlar, ularning turlari, bemorlar haqidagi ko‘plab statistik ma’lumotlarni avtomatik ravishda jamlab boradi. Ushbu yig‘ilgan axborotlar keyinchalik tahliliy ma’lumot sifatida shoshilinch holatlarda tez va to‘g‘ri qaror qabul qilish jarayonida foydalaniladi.
Xabarda aytilishicha, mazkur tizim imkoniyatlari Rossiya, AQSh, Yevropa davlatlari va Xitoy kabi qator mamlakatlar ekspertlari tomonidan sinovdan o‘tkazilib, zamonaviy talablarga to‘liq javob berishi tasdiqlangan.
Izoh (0)