Тошкент шаҳар тез тиббий ёрдам станциясига 150 та замонавий Ford русумидаги реанимобиллар топширилди. Бу ҳақда Ўзбекистон Соғлиқни сақлаш вазирлиги хабар берди.
Маълум қилинишича, бугунги кунда пойтахт аҳолисига 179 та тез ёрдам бригадаси тиббий хизмат кўрсатмоқда. Тизимда қарийб 900 нафар малакали шифокор, 1244 нафар фелдшер ва ўрта тиббиёт ходимлари фаолият юритяпти. Айни пайтгача Тошкент аҳолисига тез тиббий ёрдам кўрсатишда Nissan, Hyundai, Toyota русумли махсус автотранспортлардан ҳам фойдаланилаётган эди.
Таъкидланишича, жаҳон тиббиётининг энг сўнгги тиббий технологиялари билан жиҳозланган Ford реанимобиллари чақириқни қабул қилишдан тортиб, манзилга етиб бориш, биринчи тиббий ёрдам кўрсатиш, зарур ҳолатларда беморни шифохонага етказишда қатор қулайликларга эга. Бу машиналарнинг салонида замонавий ЭКГ, ИВЛ, дефибрилятор, сўрғич, кислород системаси ва бошқа замонавий тиббий асбоб-ускуналар, дори қутисида тез тиббий ёрдам кўрсатиш учун зарур бўлган барча турдаги дори-дармонлар бор.
Вазирликнинг хабар қилишича, Ford’ларда энг сўнгги русумдаги алоқа воситалари ҳам ўрнатилган. Бу имконият марказдаги диспетчерлик пунктида туриб машинанинг жойлашув нуқтасини, йўллардаги ҳаракатини ва машина салонида тиббий ёрдам кўрсатиш жараёнини бевосита кузатишга имкон беради. Эндиликда чақириққа отланган тез ёрдамнинг йўлларда тирбандликка дуч келиши, унга йўл берилмаслиги ҳолатлари ҳам машинага ўрнатилган алоқа воситалари хотирасига ёзиб қолинади.
Ушбу автоматлаштирилган тез тиббий ёрдам хизмати бошқарув тизими Соғлиқни сақлаш вазирлиги ҳамда Ахборот технологиялари ва коммуникацияларини ривожлантириш вазирлиги ҳамкорлигида жорий этилди. Жумладан, мазкур тизимнинг жорий этилиши орқали мурожаатларни қабул қилиш ва рўйхатга олиш, тегишли тез тиббий ёрдам станциялари бригадаларига йўналтириш ҳамда чақириқ манзилига етиб бориш вақтини кескин камайтиради.
Ушбу янги тизим чақириқларни нафақат стационар ва мобил телефон воситаси орқали, балки махсус мобил илова орқали ҳам чақириш имконини яратади. Ҳатто ногиронлиги бўлган шахслар ҳам ушбу илова орқали мустақил равишда чақириқ бериш имконига эга бўлади. Диспетчер саноқли сониялар ичида чақириқни компьютерда тўлиқ қайд қилади ва компьютер тизими автоматик равишда ушбу чақириқни чақириқ жойига энг яқин бўлган бўш бригадага узатади. Тизимга интеграция қилинган GPS-геолокация функцияси ҳар бир бригаданинг қаерда жойлашганлигини ва статусини кўрсатиб туради.
Бу тизим автоматик равишда дори воситалари, тиббий буюмлар ва ёнилғи сарфини ҳам қайд қилиб боради. Белгиланган вақт ичида бажарилган чақириқлар, уларнинг турлари, беморлар ҳақидаги кўплаб статистик маълумотларни автоматик равишда жамлаб боради. Ушбу йиғилган ахборотлар кейинчалик таҳлилий маълумот сифатида шошилинч ҳолатларда тез ва тўғри қарор қабул қилиш жараёнида фойдаланилади.
Хабарда айтилишича, мазкур тизим имкониятлари Россия, АҚШ, Европа давлатлари ва Хитой каби қатор мамлакатлар экспертлари томонидан синовдан ўтказилиб, замонавий талабларга тўлиқ жавоб бериши тасдиқланган.
Изоҳ (0)