Yunusobod tumani prokuraturasi 13 yoshli bolaning kaltaklanishi holati yuzasidan jinoyat ishi ochdi. Bu haqda 4-yanvar kuni bo‘lib o‘tgan brifingda Yunusobod tumani prokurori Habibulla Mirsoatov ma’lum qildi, deya xabar bermoqda “Gazeta.uz”.
Uning so‘zlariga ko‘ra ish 4-yanvar kuni Jinoyat kodeksining 109-moddasi 2-qismi (sog‘liqning qisqa vaqt, ya’ni 6 kundan ortiq, ammo 21 kundan ko‘p bo‘lmagan muddatga yomonlashuviga yoki umumiy mehnat qobiliyatining uncha uzoq bo‘lmagan muddatga yo‘qotilishiga sabab bo‘lgan qasddan badanga yengil shikast yetkazish)ga asosan qo‘zg‘atilgan.
“Jabrlanuvchi shikoyat qilmagan bo‘lsa-da, Jinoyat-protsessual kodeksining 325-moddasiga asosan prokuror jinoyat ishini qo‘zg‘atishga vakolatli. Biz sud-tibbiy ekspertiza xulosasi oldik va bugun Yunusobod tuman prokuraturasi jinoyat ishi ochdi, tergov harakatlari olib borilmoqda”, — dedi Habibulla Mirsoatov.
Avvalroq Toshkent shahar IIBB matbuot xizmati ushbu ish bo‘yicha vaziyat O‘zbekiston ichki ishlar vaziri o‘rinbosari — Toshkent shahar IIBB boshlig‘i general-mayor Rustam Jo‘rayev nazorati ostida ekani haqida xabar bergan edi.
Izoh (0)