Prezident Shavkat Mirziyoyev 31-dekabr kuni Turkiya prezidenti Rajab Toyyib Erdo‘g‘on bilan telefon orqali muloqot qildi. “Davlat rahbarlari kirib kelayotgan Yangi yil bilan bir-birlarini samimiy qutladilar”, — deyiladi Prezident matbuot xizmati tarqatgan axborotda.
2019-yil ikki mamlakat o‘rtasidagi do‘stlik va strategik sheriklik munosabatlarini mustahkamlashda muhim bo‘lgani mamnuniyat bilan ta’kidlangan. O‘zbekistonning Turkiy tilli davlatlar hamkorlik kengashiga to‘la huquqli a’zo sifatida kirganining tarixiy ahamiyati qayd etilgan.
Suhbat chog‘ida prezidentlar bo‘lajak oliy darajadagi uchrashuvlar siyosat, iqtisodiyot, transport kommunikatsiyalari, turizm, ta’lim, sog‘liqni saqlash va boshqa yo‘nalishlardagi o‘zaro manfaatli sheriklikni yanada mustahkamlash uchun muhim bo‘lishini qayd etgan.
“Shuningdek, xalqaro va mintaqaviy ahamiyatga molik masalalar yuzasidan fikr almashildi”, — deyiladi rasmiy axborotda.
Izoh (0)