UNG brendi ostida neft va gaz mahsulotlarini sotishni amalga oshiruvchi avtomobillarga yoqilg‘i quyish shoxobchalari tarmog‘ining boshqaruv kompaniyasi sifatida UNG Petro MChJ tashkil etildi. Bu haqda “O‘zbekneftgaz” matbuot xizmati xabar berdi.
Qayd etilishicha, avtomobilga yoqilg‘i quyish shoxobchalari tarmog‘ini tashkil etishdan maqsad — to‘laqonli milliy brendni yaratishdan iborat bo‘lib, u “O‘zbekneftgaz”AJ va iste’molchi o‘rtasidagi yagona aloqa bo‘g‘ini bo‘lib qoladi.
“Hali qilinadigan ishlar ko‘p, lekin ustuvor vazifalar belgilandi va asosiy maqsad qo‘yildi. Birinchi navbatda, respublika iqtisodiyoti va aholisini neft mahsulotlari bilan ta’minlash chora-tadbirlarini takomillashtirish, avtomobilga yoqilg‘i quyish shoxobchalarida sifatli mahsulot turi va hajmini oshirish zarur”, — dedi UNG Petro MChJ direktori Mirzohid Musayev.
Hozirgi kunda avtomobilga yoqilg‘i quyish shoxobchalari tarmog‘i orqali “O‘zbekneftgaz” AJning neftni qayta ishlash zavodlarida ishlab chiqarilgan AI-80, AI-91 rusumdagi benzin va dizel yoqilg‘isi sotilmoqda. Bundan tashqari, UNG Petro MChJ tomonidan aholiga AI-92 markali import benzinini sotish mexanizmi yo‘lga qo‘yildi.
Shunindek, AI-95 rusumidagi import benzin va Yevropa standartlariga javob beradigan dizel yoqilg‘isini olib kelish rejalashtirilmoqda. Ushbu neft mahsulotlari 2020-yilning yanvar oyi boshidan avtomobilga yoqilg‘i quyish shoxobchalarida sotila boshlanadi. Avtomobilga yoqilg‘i quyish shoxobchalari tarmog‘i orqali sotiladigan neft mahsulotlari turlarini ko‘paytirishga qaratilgan ishlar davom ettiriladi, deyiladi xabarda.
2020-yil davomida barcha avtomobilga yoqilg‘i quyish shoxobchalari rekonstruksiya qilinadi, tashqi ko‘rinishi o‘zgartiriladi.
2020-yilning sentabriga qadar Mo‘ynoq va Denov shaharlarida bugungi kun talablariga javob beradigan zamonaviy, ko‘p yoqilg‘ili shoxobchalarni qurish rejalashtirilmoqda.
Har bir shoxobchada avtomashinalar yuqori sifatli yoqilg‘i bilan ta’minlanadi, elektr avtomobillariga xizmat ko‘rsatish uchun sharoitlar yaratiladi, mijozlarga qulaylik yaratish maqsadida minimarketlar quriladi.
Laboratoriya uchun maxsus avtomobil jihozlandi. U joylardan namunalar olib, aholiga sotiladigan neft mahsulotlarining sifatini tekshiradi.
Iste’molchilarga qulaylik yaratish va ularning huquqlari buzilishining oldini olish maqsadida kun-u tun ishlaydigan “Ishonch telefoni —7 1−200−01−24” tashkil etildi va barcha avtomobilga yonilg‘i quyish shoxobchalarida bu haqda e’lon ilib chiqildi, deyiladi xabarda.
Izoh (0)