UNG бренди остида нефть ва газ маҳсулотларини сотишни амалга оширувчи автомобилларга ёқилғи қуйиш шохобчалари тармоғининг бошқарув компанияси сифатида UNG Petro МЧЖ ташкил этилди. Бу ҳақда «Ўзбекнефтгаз» матбуот хизмати хабар берди.
Қайд этилишича, автомобилга ёқилғи қуйиш шохобчалари тармоғини ташкил этишдан мақсад — тўлақонли миллий брендни яратишдан иборат бўлиб, у «Ўзбекнефтгаз»АЖ ва истеъмолчи ўртасидаги ягона алоқа бўғини бўлиб қолади.
«Ҳали қилинадиган ишлар кўп, лекин устувор вазифалар белгиланди ва асосий мақсад қўйилди. Биринчи навбатда, республика иқтисодиёти ва аҳолисини нефть маҳсулотлари билан таъминлаш чора-тадбирларини такомиллаштириш, автомобилга ёқилғи қуйиш шохобчаларида сифатли маҳсулот тури ва ҳажмини ошириш зарур», — деди UNG Petro МЧЖ директори Мирзоҳид Мусаев.
Ҳозирги кунда автомобилга ёқилғи қуйиш шохобчалари тармоғи орқали «Ўзбекнефтгаз» АЖнинг нефтни қайта ишлаш заводларида ишлаб чиқарилган АI-80, АI-91 русумдаги бензин ва дизель ёқилғиси сотилмоқда. Бундан ташқари, UNG Petro МЧЖ томонидан аҳолига АI-92 маркали импорт бензинини сотиш механизми йўлга қўйилди.
Шуниндек, АI-95 русумидаги импорт бензин ва Европа стандартларига жавоб берадиган дизел ёқилғисини олиб келиш режалаштирилмоқда. Ушбу нефть маҳсулотлари 2020 йилнинг январь ойи бошидан автомобилга ёқилғи қуйиш шохобчаларида сотила бошланади. Автомобилга ёқилғи қуйиш шохобчалари тармоғи орқали сотиладиган нефть маҳсулотлари турларини кўпайтиришга қаратилган ишлар давом эттирилади, дейилади хабарда.
2020 йил давомида барча автомобилга ёқилғи қуйиш шохобчалари реконструкция қилинади, ташқи кўриниши ўзгартирилади.
2020 йилнинг сентябрига қадар Мўйноқ ва Денов шаҳарларида бугунги кун талабларига жавоб берадиган замонавий, кўп ёқилғили шохобчаларни қуриш режалаштирилмоқда.
Ҳар бир шохобчада автомашиналар юқори сифатли ёқилғи билан таъминланади, электр автомобилларига хизмат кўрсатиш учун шароитлар яратилади, мижозларга қулайлик яратиш мақсадида минимаркетлар қурилади.
Лаборатория учун махсус автомобиль жиҳозланди. У жойлардан намуналар олиб, аҳолига сотиладиган нефть маҳсулотларининг сифатини текширади.
Истеъмолчиларга қулайлик яратиш ва уларнинг ҳуқуқлари бузилишининг олдини олиш мақсадида куну тун ишлайдиган «Ишонч телефони —7 1−200−01−24» ташкил этилди ва барча автомобилга ёнилғи қуйиш шохобчаларида бу ҳақда эълон илиб чиқилди, дейилади хабарда.
Изоҳ (0)