Qashqadaryo viloyatida joriy yilning 11 oyi davomida sodir etilgan jinoyatlarning 314 tasi profilaktika inspektorlari tomonidan fosh etilgan. Bu haqda viloyat IIBning matbuot anjumanida huquqbuzarliklar profilaktikasi boshqarmasi boshlig‘i Nosir Nazarov ma’lum qildi.
Nosir Nazarovning ma’lumot berishicha, ayni kunda viloyatda 768 nafar profilaktika inspektori hamda ularning 742 nafar jamoat tartibini saqlash bo‘yicha yordamchisi faoliyat ko‘rsatadi.
Olib borilgan profilaktik tadbirlar natijasida o‘tgan 11 oy davomida yoshlar tomonidan sodir etilgan jinoyatlar 2018-yilning ayni shu davridagi ko‘rsatkich — 820 tadan 716 taga, ya’ni 104 taga kamaygan. Ilgari sudlanganlar tomonidan sodir etilgan jinoyatlar esa 171 tadan 36 taga, ayollar tomonidan sodir etilgan jinoyatlar 239 tadan 212 taga, voyaga yetmaganlar tomonidan sodir etilgan jinoyatlar 33 tadan 22 taga kamaygan.
— Xususan viloyatda qotillik o‘tgan yilgiga nisbatan 14 taga kamaygan bo‘lsa, o‘g‘rilik 211 taga kamaygan. Firibgarlik 138 taga, tovlamachilik 9 taga kamayishiga erishdik, — deydi Nosir Nazarov.
Aytilishicha, joriy yil jinoyatchilik sur’atining pasayishiga hissa qo‘shgan profilaktika inspektorlariga 982 million 271 ming so‘m, profilaktika inspektorlarining jamoat tartibini saqlash bo‘yicha yordamchilariga esa 407 million 514 ming so‘m miqdorida mukofot puli berilgan.
Izoh (0)