Los Anjelesda jinoyatchilar Bred Pittning 5,5 million dollarlik uyiga bostirib kirishdi. Bu haqda Page Six’da xabar berilgan.
Voqea chorshanba kuni mahalliy vaqt bilan 22:30 atrofida sodir bo‘lgan. Huquq-tartibot idoralari xodimlarining ma’lum qilishicha, uch nafar gumonlanuvchi panjaradan oshib o‘tib, uyga derazadan kirgan. Ular noma’lum miqdordagi mol-mulkni o‘g‘irlab, jinoyat joyidan qochib ketgan. O‘g‘irlik sodir bo‘lgan vaqtda 61 yoshli aktyor uyda bo‘lmagan. Hozirda u “Formula 1” filmining press-turida ishtirok etmoqda. So‘nggi paytlarda u London, Mexiko va Nyu Yorkdagi premyeralarga tashrif buyurdi.
Daily Mail xabariga ko‘ra, Pitt bu uyni 2023-yil aprel oyida neft imperiyasi merosxo‘ri Eylin Gettidan sotib olgan. “Po‘lat uy” deb nomlanuvchi koshonada quyosh panellari, katta basseyn va sauna mavjud. Hududda uchta yotoqxona, ikkita yuvinish xonasi va 185 kvadrat metrdan ortiq turar joy maydoni mavjud.
Avvalroq Bred Pittning sobiq rafiqasi Jennifer Enistonning qasriga “stalker” bostirib kirgan edi. U darvozani buzib kirgan. Erkakni sud qilishmagan boisi, u aqlan nosog‘lom deb topilgan.
Izoh (0)