25-dekabr, chorshanba kuni soat 12:40 da “Qamchiq” maxsus qidiruv-qutqaruv boshqarmasi navbatchilik qismiga Namangan viloyati Pop tumanida A-373 Toshkent—O‘sh avtomobil yo‘lining 247-kilometrida yo‘l-transport hodisasi yuz bergani to‘g‘risida ma’lumot kelib tushgan. Ma’lum bo‘lishicha, Toshkent—Vodiy yo‘nalishida harakatlanib ketayotgan Cobalt, Spark hamda Lacetti avtomashinalari haydovchilari boshqaruvni yo‘qotib, yo‘l chetidagi chuqurga tushib ketgan. Bu haqda Favqulodda vaziyatlar vazirligi xabar berdi.
Vazirlik tomonidan ma’lum qilinishicha, mazkur hodisada hech kim jarohat olmagan. Voqea joyiga 11-nazorat guruhi qutqaruvchisi va “Qamchiq” navbatchilik maskani xodimi boshchiligida 5 nafar qutqaruvchi hamda “Sherobod” YPX xodimlari, “Qamchiqavtoyo‘l” ixtisoslashgan yo‘llardan foydalanish unitar korxonasi maxsus texnikalari va xodimlari yetib borgan.
Qutqaruvchilar tomonidan transport vositalarining haydovchi va yo‘lovchilariga psixologik yordam ko‘rsatilib, avtomashinalar chuqurdan chiqarilgan. Shundan so‘ng ular avtoevakuator yordamida “Sherobod” YPX maskanining jarima maydonchasiga olib ketilgan.
Bundan tashqari, shu kunning o‘zida, soat 13:00 da yana bir yo‘l transport hodisasi yuz bergan.
Xabar berilishicha, yuqoridagi YTH yuz bergan joyda Toshkent—Vodiy yo‘nalishi bo‘yicha harakatlanib kelgan Nexia avtomashinasi haydovchisi boshqaruvni yo‘qotib, shu yo‘nalishda oldinda harakatlanib kelayotgan “Qamchiqavtoyo‘l” ixtisoslashgan yo‘llardan foydalanish korxonasiga qarashli MAN rusumli tuz-qum sepadigan mashinaning ortidan kelib urgan.
Buning natijasida, Nexia salonidagi 3 nafar yo‘lovchi turli darajada tan jarohati olgan. Jabrlanganlarga birinchi yordam ko‘rsatilib, tibbiyot xodimlariga topshirilgan.
Izoh (0)