Bosh prokuratura bog‘cha mudirasini ishdan bo‘shatish maqsadida bolalarni zaharlamoqchi bo‘lgan ayollarning audioyozuvi bo‘yicha tergov harakatlari o‘tkazilayotgani haqida “Daryo”ga xabar berdi.
20-dekabr, juma kuni fuqaro S.K. tuman prokuraturasiga ariza bilan murojaat qilgan.
Fuqaro o‘z arizasida 2019-yilning 16—17-dekabr kunlari jiyani N. orqali S.F. bilan tanishganligini, u bilan jiyani Nargizani ishga qanday tiklash yuzasidan maslahat so‘raganligini, unga 6-sonli maktabgacha ta’lim muassasi mudirasi D. va tuman MTM bo‘limi boshlig‘i M. N.da adovati borligini, N.ning ustidan bir necha joylarga ariza bilan murojaat qilganligini va bog‘chadagi bolalar zaharlansa tekshirish bo‘lib, ularning barchasini ishdan olib tashlashini va ularga nisbatan jinoyat ishi qo‘zg‘atilishini, Bekobod shahrida doimo bolalar zaharlanayotganini, aynan go‘shtga dori qo‘shishni, undan dori nomini bilib berishni so‘raganini, bolalar yengil zaharlanib, kasalxonaga murojaat qilishini va shov-shuv ko‘tarilib, barcha ishdan ketishini aytganligini, F.ning bu ishlari noqonuniy ekanligi sababli unga nisbatan qonuniy chora ko‘rilishini so‘ragan.
Mazkur holat yuzasidan so‘ralgan S.F. o‘z tushuntirish xatida, 2019-yilning boshlarida uning uyiga S. ismli ayol, jiyani N. bilan izlab kelganligini, u uyda bo‘lmaganligi sababli onasidan uning telefon raqamini olib, unga telefon qilganligini va u bilan Bekobod tumani Zafar shaharchasida uchrashganligini, S. unga MTM bo‘limi boshlig‘i N.M.da adovati borligini va uni ishdan bo‘shatmoqchi ekanligini aytganligini, u S.ga N.M.ning ustidan turli idoralarga ariza bilan murojaat qilganligini, S.ni uning oldiga N.M. yuborganligidan shubhalanib, S.ni N.M. yollagan deb o‘ylab, uni sinash uchun bog‘chadagi bolalar zaharlansa, ularning barchasi ishdan ketishini aytganligini va S.ni keyingi harakatlarini bilib olmoqchi bo‘lganligini, aslida hech kimni zaharlash niyati bo‘lmaganligini bayon qilgan.
Mazkur holat yuzasidan Bekobod tuman prokuraturasi tomonidan tergovga qadar tekshiruv harakatlari olib borilmoqda, natijalari bo‘yicha qonuniy qaror qabul qilinishi ta’minlanadi.
Izoh (0)