Samarqand shahrida joylashgan “Ipak yo‘li” xalqaro turizm universiteti hamda Qozog‘istonning “Turizm va mehmondo‘stlik xalqaro universiteti” o‘rtasida tarmoq hamkorligiga oid kelishuv imzolandi. Hujjatni imzolash marosimi 21-dekabr, shanba kuni “Amirsoy” tog‘-chang‘i kurorti ochilishi doirasida bo‘lib o‘tdi.
Turizmni rivojlantirish davlat qo‘mitasining xabar berishicha, tarmoq hamkorligiga oid kelishuv bosh vazir o‘rinbosari, “Ipak yo‘li” xalqaro turizm universiteti rektori Aziz Abduhakimov hamda Qozog‘iston universiteti rektori Maynura Murzamadiyeva tomonidan imzolandi.
Mazkur hujjat professor-pedagoglar, xodimlar, talabalar, jumladan, magistrantlar, aspirantlar, doktorantlar almashinuvi, tadqiqotlar o‘tkazish va tajriba almashish, amaliyot o‘tash, shuningdek, ikki tomonlama diplom berishni ko‘zda tutuvchi “2+2” hamkorligi doirasida ikki universitet o‘rtasida qo‘shma o‘quv dasturlarini ishlab chiqish va joriy qilishni ko‘zda tutadi.
Bundan tashqari, hujjatga muvofiq, Markaziy Osiyo mintaqasida turizm industriyasi va mehmondo‘stlikni rivojlantirishga yo‘naltirilgan qo‘shma konferensiyalar, akademik uchrashuvlar, simpoziumlar, muhokamalar doiralari, mahorat darslari kabi tadbirlar o‘tkaziladi.
Qayd etilishicha, ushbu kelishuv asosida ikki universitet mutaxassislari va o‘quvchilarini jalb qilgan holda, ilmiy maktablar, markazlar va laboratoriyalarni tashkil qilish hamda ularning faoliyatini yuritish, shuningdek, loyihalarni tijoratlashtirishda birgalikda ishtirok etish mumkin bo‘ladi.
Xalqaro, davlat, jamoatchilik va xususiy tashkilotlar hamda jamg‘armalar tomonidan e’lon qilinuvchi ilmiy grantlardagi birgalikdagi ishtirok ham shular jumlasidandir.
Izoh (0)