Аввалроқ Тошкент шаҳар ҳокимлиги Яшнобод туманидаги сайлов участкаларида «черновик» протоколлардан фойдаланиши ҳолатлари содир бўлгани ҳақида хабар берилганди. «Черновик» протоколларга оид ёзишмаларнинг скриншотлари сайлов куни давомида @saylov_2019bot Telegram-боти орқали сайловдаги қоидабузарликлар ҳақидаги маълумотларни тўплаб борган ҳуқуқшунос ва блогер Хушнуд Худойбердиев томонидан эълон қилинган эди. МСК вакиллари, ҳуқуқ-тартибот органлари ходимлари, «Дарё», «Gazeta.uz», «Kun.uz» ва бошқа нашрлар журналистлари, блогерлар ва Хушнуд Худойбердиевнинг ўзи ярим тун бўлишига қарамасдан Яшнобод туманига йўл олиб, вазиятни ўрганди.
Скриншотларда Қудрат Ҳусанов номидан қолдирилган ёзувларни кўриш мумкин, унда Ҳусанов овоз бериш жараёни якунига етиши билан сайлов участкаларидаги протоколларнинг «черновик» вариантларини зудлик билан олиб келиш ҳақида топшириқ берган. «Черновикдан копия ҳам берилмасинми?», деган саволга, у: «Йўқ, опа, умуман», деб жавоб берган. Ёзишмаларда: «Ҳеч ким протоколни расмга олдирмасин», деган ёзув ҳам бор.
Хуллас кўпчилик бўлиб сайлов округига бордик.Воқеа қаҳрамони, 27 ёшли Қудрат Хусанов билан ҳам суҳбатлашдик. Вазиятни тушунтиришга ҳаракат қилди. Қолганини видеода батафсил баён қилганман.
Албатта, умуман олганда бироз кўнгилсиз иш бўлди. Аммо воқеалар ривожида мени бир нарса хурсанд қилди.
ОАВ вакиллари туман сайлов округига боришганида ярим тун бўлса ҳам, казо-казо мутасаддилар аллақачон етиб келишганди. Ва улар журналистларга ўта ҳурмат билан муносабатда бўлишди. Барча шароитни яратиб беришди. «Яна хизматлар борми?» деб сўрашди охирида.
Бунақа вазиятда одатда «қайси биринг ёздинг?», «нега бунақа иғво ёзасан?», «сиёсатимизга қаршимисан?», «ақлингни киритиб қўйиш керак экан» деган муносабатга ўрганиб қолгандик.
Ҳеч бир жамият хатодан ҳоли эмас, аммо энг яхши жамият хатоларни тан олади, тўғри муносабатда бўлади ва кенг жамоатчилик олдида ҳисобдорликни ҳис қилади. Мана шуниси ўта муҳим!
Тезкор муносабат ва ҳамкорлик учун Марказий сайлов комиссияси ҳамда Бош прокуратурага миннатдорлик билдираман.
Хушнуд Худойбердиев, блогер
Изоҳ (0)