Skrinshotlarda Qudrat Husanov nomidan qoldirilgan yozuvlarni ko‘rish mumkin, unda Husanov ovoz berish jarayoni yakuniga yetishi bilan saylov uchastkalaridagi protokollarning “chernovik” variantlarini zudlik bilan olib kelish haqida topshiriq bergan. “Chernovikdan kopiya ham berilmasinmi?”, degan savolga, u: “Yo‘q, opa, umuman”, deb javob bergan. Yozishmalarda: “Hech kim protokolni rasmga oldirmasin”, degan yozuv ham bor.
Xushnudbek Xudoyberdiyevning aniqlik kiritishicha, yozishmadagi gap-so‘zlar tuman kengashi deputatligi uchun saylovlarga taalluqli.
Toshkent shahar hokimligi axborotida tasdiqlanishicha, yozishma haqiqatan ham Yashnobod tuman saylov komissiyasining saylov okruglari mas’ullari uchun ochilgan xos Telegram-guruhda olib borilgan.
Shahar hokimligi va huquq-tartibot organlari olib borgan o‘rganish natijalariga ko‘ra, bu yozuvlar haqiqatan ham Yashnobod tumani kadrlar bo‘limi rahbari Qudrat Husanovga tegishli ekani aniqlangan.
“U haqiqatan ham saylov okruglari mas’ullarini “chernovik” protokollari bilan aytilgan manzilga yetib kelishlarini talab qilgan”, — deyiladi hokimlik axborotida.
Ayni paytda “chernovik”lardagi ma’lumotlar hech qanday o‘zgarishsiz, nazorat ostida original protokllarga ko‘chirilmoqda.
Qudrat Husanov hamda boshqa mas’ullarning harakatlari o‘rganilmoqda va saylov natijalariga aralashish holati aniqlansa, ularga nisbatan tegishli choralar ko‘riladi, deyiladi hokimlik axborotida.
Markaziy saylov komissiyasi (MSK) ham hodisa o‘rganilayotganini ma’lum qildi. MSK vakillari, huquq-tartibot organlari xodimlari, “Daryo”, “Gazeta.uz”, “Kun.uz” va boshqa nashrlar jurnalistlari, blogerlar va Xushnud Xudoyberdiyevning o‘zi Yashnobod tumaniga yo‘l olgan.
MSKdan ma’lum qilishlaricha, ushbu surishtiruv ishlarida xorijlik kuzatuvchilar ham hech bir moneliksiz ishtirok etishlari mumkin.
Izoh (0)