O‘zbekiston Prezidenti Shavkat Mirziyoyevning Yaponiyaga tashrifi asosiy tadbirlari 19-dekabr, payshanba kuni Tokioda bo‘lib o‘tdi. Bu haqda Prezident matbuot xizmati xabar berdi.
Ma’lum qilinishicha, Kantey qarorgohida rasmiy kutib olish marosimi bo‘lib o‘tdi. O‘zbekiston Prezidentini Yaponiya bosh vaziri Sindzo Abe kutib oldi. Ular davlat bayroqlari oldida qo‘l berib ko‘rishdi.
Davlat madhiyalari yangradi. Shavkat Mirziyoyev va Sindzo Abe oliy martabali mehmon sharafiga saf tortgan faxriy qorovul oldidan o‘tdi. Ularga delegatsiyalar tanishtirildi.
Shundan so‘ng ikki mamlakat delegatsiyalari ishtirokida muzokara o‘tkazildi.
Yaponiya hukumati rahbari O‘zbekiston Prezidentini samimiy qutlar ekan, ushbu tashrif “Reyva” (“Go‘zal uyg‘unlik”) davrining birinchi yilida o‘tayotganini alohida ta’kidladi.
Yaponiya O‘zbekiston bilan do‘stlik va strategik sheriklik munosabatlarini mustahkamlashga alohida ahamiyat qaratayotgani qayd etildi.
Sindzo Abe O‘zbekistonda amalga oshirilayotgan keng miqyosli islohotlarni yuksak baholadi va ularni to‘liq qo‘llab-quvvatlashini bildirdi. O‘zbekiston Markaziy Osiyoda mintaqaviy hamkorlikni jonlantirishga faol hissa qo‘shayotgani ta’kidlandi.
Prezident Shavkat Mirziyoyev, o‘z navbatida, Yaponiya hukumati rahbariga samimiy qabul uchun minnatdorlik bildirib, yapon xalqini “Reyva” davri boshlangani bilan tabrikladi.
O‘zbekiston rahbari ikki tomonlama ko‘p qirrali sheriklikni sifat jihatidan yangi darajaga ko‘tarish borasidagi intilishi qat’iy ekanini ta’kidladi.
Yaponiya hukumatiga O‘zbekistondagi islohotlar va iqtisodiy modernizatsiyani qo‘llab-quvvatlayotgani, shuningdek, yuqori malakali kadrlar tayyorlashga ko‘maklashayotgani uchun minnatdorlik bildirildi.
Uchrashuvda konstruktiv siyosiy muloqotni davom ettirish yo‘nalishlari ko‘rib chiqildi. Dolzarb xalqaro ahamiyatga molik masalalar bo‘yicha tomonlarning yondashuvlari yaqinligi qayd etildi.
Parlamentlararo aloqalar, jumladan, Yaponiya parlamentidagi O‘zbekiston bilan do‘stlik ligasining faol ishtiroki doirasida jonlangani mamnuniyat bilan qayd etildi. Asosiy e’tibor O‘zbekistonda iqtisodiy islohotlarni qo‘llab-quvvatlashga qaratildi.
Ikki mamlakat yetakchilari o‘zaro savdo hajmini yanada oshirish, investitsiyaviy, texnologik, moliyaviy va moliyaviy-texnik hamkorlikni kengaytirishni taklif etdi.
O‘zbekiston Prezidentining Yaponiyaga tashrif doirasida bo‘lib o‘tgan ishbilarmonlik tadbirlarining natijalari katta mamnuniyat bilan tilga olindi.
Energetika, qazib olish tarmog‘i, mashinasozlik, kimyo sanoati, qishloq xo‘jaligi, to‘qimachilik, turizm va boshqa ustuvor yo‘nalishlarda, avvalo, Yaponiya yetakchi kompaniya va banklarining to‘g‘ridan to‘g‘ri investitsiyalari va ilg‘or texnologiyalarini jalb qilgan holda istiqbolli loyihalarni amalga oshirish ma’qullandi.
Delegatsiyalar rahbarlari Yaponiya xalqaro hamkorlik agentligi orqali moliyaviy va moliyaviy-texnik sheriklik kengayib borayotganini olqishladi.
Bundan tashqari, hududlararo aloqalarni, tartibli mehnat migratsiyasi, ta’lim, sog‘liqni saqlash, madaniy almashinuv sohalarida hamkorlikni kengaytirish masalalari muhokama qilindi.
Asosiy yo‘nalishlarda qo‘shma loyihalarni muvofiqlashtirish va ilgari surishning institutsional mexanizmlari kelishib olindi.
Uchrashuv yakunida tomonlar muzokara natijalaridan mamnun ekanliklarini bildirdi, do‘stlik va strategik sheriklik munosabatlarining yangi davrini boshlash borasida qat’iy ekanligini ta’kidladi.
Yaponiya bosh vaziri Sindzo Abe O‘zbekiston Prezidenti Shavkat Mirziyoyevning o‘zi uchun qulay vaqtda O‘zbekistonga tashrif bilan kelish taklifini minnatdorlik bilan qabul qildi.
Eslatib o‘tamiz, Shavkat Mirziyoyev Yaponiya bosh vaziri Sindzo Abening taklifiga binoan rasmiy tashrif bilan 17-dekabr kuni Yaponiyaga keldi. Prezidentni Tyubu xalqaro aeroportida Yaponiya rasmiy doiralari vakillari kutib oldi.
Prezident Nagoya shahrida ushbu shahar meri Takasi Kavamura bilan Toshkentda Nagoya yuqori texnologiyalar parkini tashkil etish, iqtisodiyot, sanoat, transport, ta’lim, turizm va boshqa ustuvor yo‘nalishlarda innovatsion loyihalarni amalga oshirish masalalarini muhokama qildi. Yaponiyaning yirik kompaniyalarini O‘zbekistonga taklif etdi.
Shuningdek, Nobel mukofoti sovrindorlari yetishib chiqqan Nagoya universitetida o‘qiyotgan o‘zbekistonlik yoshlar bilan uchrashdi, Universitetning ilmiy kengashi Shavkat Mirziyoyevga universitet faxriy doktori unvonini berdi.
Tashrifning uchinchi kuni parlament quyi palatasida bo‘lib, vakillar palatasi raisi Tadamori Osima bilan O‘zbekiston—Yaponiya parlamentlararo munosabatlarini yanada rivojlantirish masalalarini muhokama qildi. Shuningdek, shu kuni Shavkat Mirziyoyev Yaponiya parlamentining Maslahatchilar (yuqori) palatasi prezidenti Akiko Santo bilan ham uchrashdi.
Davlat rahbarining rasmiy tashrifi 20-dekabrgacha davom etishi va qiymati 6,5 milliard dollarga teng bo‘lgan 48 ta kelishuv va shartnoma imzolanishi kutilmoqda. Tashrif doirasida Yaponiyaning yirik shaharlaridagi LED-ekranlarda O‘zbekistonning turistik salohiyati namoyish etilmoqda.
Izoh (0)