Ўзбекистон Президенти Шавкат Мирзиёевнинг Японияга ташрифи асосий тадбирлари 19 декабрь, пайшанба куни Токиода бўлиб ўтди. Бу ҳақда Президент матбуот хизмати хабар берди.
Маълум қилинишича, Кантей қароргоҳида расмий кутиб олиш маросими бўлиб ўтди. Ўзбекистон Президентини Япония бош вазири Синдзо Абэ кутиб олди. Улар давлат байроқлари олдида қўл бериб кўришди.
Давлат мадҳиялари янгради. Шавкат Мирзиёев ва Синдзо Абэ олий мартабали меҳмон шарафига саф тортган фахрий қоровул олдидан ўтди. Уларга делегациялар таништирилди.
Шундан сўнг икки мамлакат делегациялари иштирокида музокара ўтказилди.
Япония ҳукумати раҳбари Ўзбекистон Президентини самимий қутлар экан, ушбу ташриф «Рейва» («Гўзал уйғунлик») даврининг биринчи йилида ўтаётганини алоҳида таъкидлади.
Япония Ўзбекистон билан дўстлик ва стратегик шериклик муносабатларини мустаҳкамлашга алоҳида аҳамият қаратаётгани қайд этилди.
Синдзо Абэ Ўзбекистонда амалга оширилаётган кенг миқёсли ислоҳотларни юксак баҳолади ва уларни тўлиқ қўллаб-қувватлашини билдирди. Ўзбекистон Марказий Осиёда минтақавий ҳамкорликни жонлантиришга фаол ҳисса қўшаётгани таъкидланди.
Президент Шавкат Мирзиёев, ўз навбатида, Япония ҳукумати раҳбарига самимий қабул учун миннатдорлик билдириб, япон халқини «Рейва» даври бошлангани билан табриклади.
Ўзбекистон раҳбари икки томонлама кўп қиррали шерикликни сифат жиҳатидан янги даражага кўтариш борасидаги интилиши қатъий эканини таъкидлади.
Япония ҳукуматига Ўзбекистондаги ислоҳотлар ва иқтисодий модернизацияни қўллаб-қувватлаётгани, шунингдек, юқори малакали кадрлар тайёрлашга кўмаклашаётгани учун миннатдорлик билдирилди.
Учрашувда конструктив сиёсий мулоқотни давом эттириш йўналишлари кўриб чиқилди. Долзарб халқаро аҳамиятга молик масалалар бўйича томонларнинг ёндашувлари яқинлиги қайд этилди.
Парламентлараро алоқалар, жумладан, Япония парламентидаги Ўзбекистон билан дўстлик лигасининг фаол иштироки доирасида жонлангани мамнуният билан қайд этилди. Асосий эътибор Ўзбекистонда иқтисодий ислоҳотларни қўллаб-қувватлашга қаратилди.
Икки мамлакат етакчилари ўзаро савдо ҳажмини янада ошириш, инвестициявий, технологик, молиявий ва молиявий-техник ҳамкорликни кенгайтиришни таклиф этди.
Ўзбекистон Президентининг Японияга ташриф доирасида бўлиб ўтган ишбилармонлик тадбирларининг натижалари катта мамнуният билан тилга олинди.
Энергетика, қазиб олиш тармоғи, машинасозлик, кимё саноати, қишлоқ хўжалиги, тўқимачилик, туризм ва бошқа устувор йўналишларда, аввало, Япония етакчи компания ва банкларининг тўғридан тўғри инвестициялари ва илғор технологияларини жалб қилган ҳолда истиқболли лойиҳаларни амалга ошириш маъқулланди.
Делегациялар раҳбарлари Япония халқаро ҳамкорлик агентлиги орқали молиявий ва молиявий-техник шериклик кенгайиб бораётганини олқишлади.
Бундан ташқари, ҳудудлараро алоқаларни, тартибли меҳнат миграцияси, таълим, соғлиқни сақлаш, маданий алмашинув соҳаларида ҳамкорликни кенгайтириш масалалари муҳокама қилинди.
Асосий йўналишларда қўшма лойиҳаларни мувофиқлаштириш ва илгари суришнинг институционал механизмлари келишиб олинди.
Учрашув якунида томонлар музокара натижаларидан мамнун эканликларини билдирди, дўстлик ва стратегик шериклик муносабатларининг янги даврини бошлаш борасида қатъий эканлигини таъкидлади.
Япония бош вазири Синдзо Абэ Ўзбекистон Президенти Шавкат Мирзиёевнинг ўзи учун қулай вақтда Ўзбекистонга ташриф билан келиш таклифини миннатдорлик билан қабул қилди.
Эслатиб ўтамиз, Шавкат Мирзиёев Япония бош вазири Синдзо Абэнинг таклифига биноан расмий ташриф билан 17 декабрь куни Японияга келди. Президентни Тюбу халқаро аэропортида Япония расмий доиралари вакиллари кутиб олди.
Президент Нагоя шаҳрида ушбу шаҳар мери Такаси Кавамура билан Тошкентда Нагоя юқори технологиялар паркини ташкил этиш, иқтисодиёт, саноат, транспорт, таълим, туризм ва бошқа устувор йўналишларда инновацион лойиҳаларни амалга ошириш масалаларини муҳокама қилди. Япониянинг йирик компанияларини Ўзбекистонга таклиф этди.
Шунингдек, Нобел мукофоти совриндорлари етишиб чиққан Нагоя университетида ўқиётган ўзбекистонлик ёшлар билан учрашди, Университетнинг илмий кенгаши Шавкат Мирзиёевга университет фахрий доктори унвонини берди.
Ташрифнинг учинчи куни парламент қуйи палатасида бўлиб, вакиллар палатаси раиси Тадамори Осима билан Ўзбекистон—Япония парламентлараро муносабатларини янада ривожлантириш масалаларини муҳокама қилди. Шунингдек, шу куни Шавкат Мирзиёев Япония парламентининг Маслаҳатчилар (юқори) палатаси президенти Акико Санто билан ҳам учрашди.
Давлат раҳбарининг расмий ташрифи 20 декабргача давом этиши ва қиймати 6,5 миллиард долларга тенг бўлган 48 та келишув ва шартнома имзоланиши кутилмоқда. Ташриф доирасида Япониянинг йирик шаҳарларидаги LED-экранларда Ўзбекистоннинг туристик салоҳияти намойиш этилмоқда.
Изоҳ (0)