Toshkentda “Yil imomi” aniqlandi (video)

12-dekabr kuni poytaxtdagi “Shayx Muhammad Sodiq Muhammad Yusuf” majmuasida O‘zbekiston musulmonlari idorasi tomonidan har yili an’anaviy ravishda o‘tkazib kelinayotgan “Eng ma’rifatli imom” ko‘rik-tanlovining yakuniy bosqichi bo‘lib o‘tdi. Bu haqda din ishlari bo‘yicha qo‘mita matbuot xizmati xabar berdi.

Tanlovdan ko‘zlangan asosiy maqsad bugungi kun talablariga javob beradigan, ilmiy salohiyatga ega, tashabbuskor, ilg‘or fikrli, zamonaviy axborot texnologiyalaridan foydalana oladigan va keng xalq ommasiga o‘z fikrini yetkazish qobiliyatiga ega bo‘lgan eng iqtidorli, faol imomlarni aniqlash va qo‘llab-quvvatlashdir.

Tanlovning hal qiluvchi — respublika bosqichida Qoraqalpog‘iston Respublikasi, Toshkent shahri va viloyat bosqichi g‘oliblari ishtirok etdi.

Ishtirokchilarning Qur’oni karim qiroati va tafsiri, aqoid, fiqh ilmi, ijtimoiy-ma’naviy yo‘nalishdagi bilimlari hakamlar hay’ati tomonidan baholab borildi. Shuningdek, ular yil davomida amalga oshirilgan ishlari, OAVdagi ishtiroki, targ‘ibot tadbirlari bo‘yicha taqdimot qildi.

Yakuniy natijalarga ko‘ra quyidagi ishtirokchilar yuqori o‘rinlarni qo‘lga kiritdi:

• 1-o‘rin — Toshkent shahri “Dorussalom” jome masjidi imom-xatibi Muhammadrahim Abduqodirov;
• 2-o‘rin — Toshkent viloyati “Abdulqodir Maxsum” jome masjidi imom-xatibi Abdulbosit Nusratullayev;
• 3-o‘rin — Farg‘ona viloyati “Said Jalolxonto‘ra” jome masjidi imom-xatibi Yunusxon Mamarasulov va Xorazm viloyati “Miskin bobo” jome masjidi imom-xatibi Qo‘ziboy Masharipov.

• “Eng ko‘p obuna uyushtirgan imom” – Andijon viloyati Asaka tumani “Xolid ibn Valid” jome masjidi imom-xatibi Shahobiddin Parpiyev;
• “Eng ko‘p maqola chop etgan imom” – Toshkent viloyati “Sobirjon ota” jome masjidi imom-xatibi Sunnatulloh Ernazapov;
• “Eng obod masjid” – Jizzax viloyati Jizzax shahri “Xo‘ja Nuriddin hoji” jome masjidi;
• “Eng intizomli imom” – Navoiy viloyati “Oqtosh” jome masjidi imom-xatibi Dilshod Ergashev;
• “Eng faol imom” – Qashqadaryo viloyati Shahrisabz tumani “Hazrati Imom” jome masjidi imom-xatibi Fazliddin Muxtorov.