12 декабрь куни пойтахтдаги «Шайх Муҳаммад Содиқ Муҳаммад Юсуф» мажмуасида Ўзбекистон мусулмонлари идораси томонидан ҳар йили анъанавий равишда ўтказиб келинаётган «Энг маърифатли имом» кўрик-танловининг якуний босқичи бўлиб ўтди. Бу ҳақда дин ишлари бўйича қўмита матбуот хизмати хабар берди.
Танловдан кўзланган асосий мақсад бугунги кун талабларига жавоб берадиган, илмий салоҳиятга эга, ташаббускор, илғор фикрли, замонавий ахборот технологияларидан фойдалана оладиган ва кенг халқ оммасига ўз фикрини етказиш қобилиятига эга бўлган энг иқтидорли, фаол имомларни аниқлаш ва қўллаб-қувватлашдир.
Танловнинг ҳал қилувчи — республика босқичида Қорақалпоғистон Республикаси, Тошкент шаҳри ва вилоят босқичи ғолиблари иштирок этди.
Иштирокчиларнинг Қуръони карим қироати ва тафсири, ақоид, фиқҳ илми, ижтимоий-маънавий йўналишдаги билимлари ҳакамлар ҳайъати томонидан баҳолаб борилди. Шунингдек, улар йил давомида амалга оширилган ишлари, ОАВдаги иштироки, тарғибот тадбирлари бўйича тақдимот қилди.
Якуний натижаларга кўра қуйидаги иштирокчилар юқори ўринларни қўлга киритди:
- 1-ўрин — Тошкент шаҳри «Доруссалом» жоме масжиди имом-хатиби Муҳаммадраҳим Абдуқодиров;
- 2-ўрин — Тошкент вилояти «Абдулқодир Махсум» жоме масжиди имом-хатиби Абдулбосит Нусратуллаев;
- 3-ўрин — Фарғона вилояти «Саид Жалолхонтўра» жоме масжиди имом-хатиби Юнусхон Мамарасулов ва Хоразм вилояти «Мискин бобо» жоме масжиди имом-хатиби Қўзибой Машарипов.
- «Энг кўп обуна уюштирган имом» – Андижон вилояти Асака тумани «Холид ибн Валид» жоме масжиди имом-хатиби Шаҳобиддин Парпиев;
- «Энг кўп мақола чоп этган имом» – Тошкент вилояти «Собиржон ота» жоме масжиди имом-хатиби Суннатуллоҳ Эрназапов;
- «Энг обод масжид» – Жиззах вилояти Жиззах шаҳри «Хўжа Нуриддин ҳожи» жоме масжиди;
- «Энг интизомли имом» – Навоий вилояти «Оқтош» жоме масжиди имом-хатиби Дилшод Эргашев;
- «Энг фаол имом» – Қашқадарё вилояти Шаҳрисабз тумани «Ҳазрати Имом» жоме масжиди имом-хатиби Фазлиддин Мухторов.
Изоҳ (0)