Senatorlar “Maktabgacha ta’lim va tarbiya to‘g‘risida”gi yangi qonunni ma’qulladi

Oliy Majlis Senatining yalpi majlisida “Maktabgacha ta’lim va tarbiya to‘g‘risida”gi yangi qonun ko‘rib chiqildi, deb xabar beradi O‘zA.

Ta’kidlanishicha, qonunda “alohida ta’lim olish ehtiyojlari bo‘lgan bolalar”, “inklyuziv ta’lim va tarbiya”, “davlat maktabgacha ta’lim tashkiloti”, “nodavlat maktabgacha ta’lim tashkiloti”, “pedagogning kasbiy standarti” va shu kabi qator tushunchalar kiritilgan va mazmuni ochib berilgan.

Maktabgacha ta’lim va tarbiyaning asosiy tamoyillari, ushbu sohadagi davlat siyosatining asosiy yo‘nalishlari va kafolatlari qonundan o‘rin olgan.

Majlis ishtirokchilari qayd etganlaridek, qonunning ma’qullanishi maktabgacha ta’lim sohasining zamon talabi darajasida rivojlanishiga xizmat qiladi.

Ma’lumotlarga ko‘ra, maktabgacha yoshdagi bolalarni bog‘chaga qamrab olish joriy yilning birinchi yarmida 40,5 foizni tashkil qildi. Maktabgacha ta’lim muassasalari soni esa 4 ming 940 tadan 9 ming 774 ga yoki qariyb ikki barobarga ko‘paygan.

Barcha maktabgacha ta’lim tashkiloti uchun davlat maktabgacha ta’lim standartlarining majburiyligi belgilab qo‘yilayotgani bolalarning sifatli ta’lim va tarbiya olishlarining kafolatini ta’minlaydi.

Majlisda senatorlar tomonidan bolalarni sog‘lom ovqatlantirishni tashkil etish, o‘z vaqtida ta’lim jarayoniga jalb qilish, dam olishi va ovqatlanishini to‘g‘ri tashkil etish muhim ahamiyat kasb etishi alohida qayd etildi.