Jizzaxda 34 yillik mehnat faoliyati davomida mehnat ta’tiliga chiqmagan Gulchehra Yaxshiboyevaga kompensatsiya puli undirib berildi. Bu haqda viloyat kasaba uyushmalari tashkilotlari birlashmasi vakillari ma’lum qildi, deya xabar beradi “Sof.uz”.
Kasaba uyushmasi Gulchehra Yaxshiboyeva manfaatini ko‘zlab javobgar Baxmal tuman tibbiyot birlashmasiga nisbatan foydalanilmagan mehnat ta’tili uchun kompensatsiya hamda ma’naviy zarar undirish to‘g‘risidagi da’vo talabi bilan murojaat qildi. Unda 34 yillik faoliyati davomida mehnat ta’tilidan foydalanilmaganligi uchun kompensatsiya hamda 12 million so‘m ma’naviy zarar undirilishi so‘ralgan.
Sud majlisida arizachi G.Yaxshiboyeva 1976-yil dekabr oyidan 2016-yil 14-yanvarga qadar Baxmal tuman tibbiyot birlashmasida hamshira vazifasida ishlab kelganligi, 1982—2015-yillar davomida mehnat ta’tiliga chiqmaganligi ma’lum qilingan. Mehnat qonunchiligiga ko‘ra, mehnat shartnomasi bekor qilinganda xodimga foydalanilmagan barcha yillik asosiy va qo‘shimcha ta’tillar uchun pullik kompensatsiya to‘lanishi belgilab qo‘yilgan.
Sud qarori bilan javobgar Baxmal tuman tibbiyot birlashmasidan Gulchehra Yaxshiboyeva foydasiga 34 110 848 so‘m kompensatsiya undirildi.
Izoh (0)