O‘zbekiston ko‘zi ojizlar jamiyati Farg‘ona viloyati bo‘limiga tegishli “Shohimardon” dam olish maskani hokimliklar tomonidan zo‘ravonliklarcha tortib olinib, boshqa bir tashkilotga berib yuborilgani haqidagi xabarlar OAV nashrlarida e’lon qilindi.
Xabar berilishicha, Farg‘ona viloyati prokuraturasi tomonidan fuqaro B.Boltaboyev va boshqalarning hokim qarori va boshqalardan norozi bo‘lib O‘zbekiston Prezidentiga yo‘llagan murojaati ko‘rib chiqilgan.
Ma’lum qilinishicha, Farg‘ona tuman hokimining 1999-yil 15-maydagi hamda 2009-yil 19-sentabrdagi qarorlari bilan Farg‘ona tumani “Shohimardon” MFY Porsin ko‘chasida joylashgan yer maydoni 1,04 gektar bo‘lgan dam olish maskani bino-inshootlariga O‘zbekiston ko‘zi ojizlar jamiyati markaziy boshqaruvining egalik huquqi tiklanib, 2010-yil 15-yanvarda kadastr hujjatlari tayyorlangan va bino-inshootlarga bo‘lgan huquqini davlat ro‘yxatidan o‘tkazilganligi to‘g‘risida guvohnoma berilgan.
Farg‘ona viloyat hokimining 2018-yil 23-yanvardagi yig‘ilish bayoniga asosan tashkil etilgan ishchi guruhining 2018-yil 24-yanvardagi dalolatnomasiga asosan O‘zbekiston ko‘zi ojizlar jamiyati Markaziy boshqaruvi ixtiyorida bo‘lgan dam olish maskani bino-inshootlari maqsadli foydalanilmayotganligi va qarovsiz holatdaligi aniqlanib, ushbu obyektni belgilangan tartibda tuman balansiga olish taklifi berilgan.
Farg‘ona tuman hokimining 2018-yil 25-yanvardagi qarori bilan O‘zbekiston ko‘zi ojizlar jamiyati Markaziy boshqaruvi ixtiyorida bo‘lgan dam olish maskani bino-inshootlari tuman zaxirasiga qaytarib olingan.
O‘zbekiston ko‘zi ojizlar jamiyati Markaziy boshqaruvi rayosatining 2018-yil 18-dekabrdagi qarori bilan “Shohimardon” dam olish maskani jamiyatning Farg‘ona viloyati bo‘limiga o‘tkazilgan.
Shuningdek, O‘zbekiston Prezidentining 2018-yil 4-sentabrdagi PQ-3928-sonli qarori ijrosi yuzasidan viloyat Idoralararo komissiyasining 2018-yil 17-dekabrdagi xulosasi asosida dam olish maskaniga nisbatan ta’sirchan soliq mexanizmi qo‘llanilgan.
Mazkur xulosa Toshloq tuman ma’muriy sudining 2019-yil 16-sentabrdagi hal qiluv qarori bilan haqiqiy emas deb topilgan.
Bundan tashqari, Farg‘ona tumani hokimining 2019-yil 12-noyabrdagi qarori bilan “Shohimardon” dam olish maskani “Ma’naviyat va ma’rifat markazi” viloyat bo‘limi balansiga o‘tkazib berilgan.
Hozirda markaz tomonidan ushbu obyektda qurilish ta’mirlash ishlari amalga oshirilmoqda.
Izoh (0)