Ўзбекистон кўзи ожизлар жамияти Фарғона вилояти бўлимига тегишли «Шоҳимардон» дам олиш маскани ҳокимликлар томонидан зўравонликларча тортиб олиниб, бошқа бир ташкилотга бериб юборилгани ҳақидаги хабарлар ОАВ нашрларида эълон қилинди.
Хабар берилишича, Фарғона вилояти прокуратураси томонидан фуқаро Б.Болтабоев ва бошқаларнинг ҳоким қарори ва бошқалардан норози бўлиб Ўзбекистон Президентига йўллаган мурожаати кўриб чиқилган.
Маълум қилинишича, Фарғона туман ҳокимининг 1999 йил 15 майдаги ҳамда 2009 йил 19 сентябрдаги қарорлари билан Фарғона тумани «Шоҳимардон» МФЙ Порсин кўчасида жойлашган ер майдони 1,04 гектар бўлган дам олиш маскани бино-иншоотларига Ўзбекистон кўзи ожизлар жамияти марказий бошқарувининг эгалик ҳуқуқи тикланиб, 2010 йил 15 январда кадастр ҳужжатлари тайёрланган ва бино-иншоотларга бўлган ҳуқуқини давлат рўйхатидан ўтказилганлиги тўғрисида гувоҳнома берилган.
Фарғона вилоят ҳокимининг 2018 йил 23 январдаги йиғилиш баёнига асосан ташкил этилган ишчи гуруҳининг 2018 йил 24 январдаги далолатномасига асосан Ўзбекистон кўзи ожизлар жамияти Марказий бошқаруви ихтиёрида бўлган дам олиш маскани бино-иншоотлари мақсадли фойдаланилмаётганлиги ва қаровсиз ҳолатдалиги аниқланиб, ушбу объектни белгиланган тартибда туман балансига олиш таклифи берилган.
Фарғона туман ҳокимининг 2018 йил 25 январдаги қарори билан Ўзбекистон кўзи ожизлар жамияти Марказий бошқаруви ихтиёрида бўлган дам олиш маскани бино-иншоотлари туман захирасига қайтариб олинган.
Ўзбекистон кўзи ожизлар жамияти Марказий бошқаруви раёсатининг 2018 йил 18 декабрдаги қарори билан «Шоҳимардон» дам олиш маскани жамиятнинг Фарғона вилояти бўлимига ўтказилган.
Шунингдек, Ўзбекистон Президентининг 2018 йил 4 сентябрдаги ПҚ-3928-сонли қарори ижроси юзасидан вилоят Идоралараро комиссиясининг 2018 йил 17 декабрдаги хулосаси асосида дам олиш масканига нисбатан таъсирчан солиқ механизми қўлланилган.
Мазкур хулоса Тошлоқ туман маъмурий судининг 2019 йил 16 сентябрдаги ҳал қилув қарори билан ҳақиқий эмас деб топилган.
Бундан ташқари, Фарғона тумани ҳокимининг 2019 йил 12 ноябрдаги қарори билан «Шоҳимардон» дам олиш маскани «Маънавият ва маърифат маркази» вилоят бўлими балансига ўтказиб берилган.
Ҳозирда марказ томонидан ушбу объектда қурилиш таъмирлаш ишлари амалга оширилмоқда.
Изоҳ (0)