Surxondaryo viloyati hokimi To‘ra Bobolov Termizdan Sariosiyo stansiyasigacha bo‘lgan 180 kilometrlik temir yo‘l atroflarini ko‘zdan kechirdi. Hokim viloyatdagi tegishli tuman rahbarlari, mutasaddi idoralar mas’ullari hamrohligida poyezdda yurib, ushbu hududlardagi obodonlashtirish ishlari bilan tanishgan. Bu haqda Surxondaryo viloyati hokimligi matbuot xizmati xabar berdi.
Xabarga ko‘ra, To‘ra Bobolov temir yo‘l o‘tgan hududlarni aylanish chog‘ida ko‘zga tashlangan kamchiliklarni bartaraf qilish va tartibga keltirish yuzasidan mas’ul rahbarlarga topshiriqlar bergan.
Shuningdek, temir yo‘l atrofida faoliyat olib borayotgan korxonalar, viloyat aholisi istiqomat qiladigan uylar holati ham o‘rganilgan, binolarni tartibga keltirish, ularning tashqi ko‘rinishini zamonaviy talablar asosida ta’mirlash tavsiya qilingan.
2-dekabr, dushanba kuni “Toshkent—Termiz” yo‘nalishida harakatlanayotgan poyezd to‘xtab qolib, yo‘lovchilar o‘nlab avtobuslarda tashilgan. “O‘zbekiston temir yo‘llari” AJ ijtimoiy tarmoqlarda tarqalgan video yuzasidan rasmiy izoh bergan va “Jarquduq—Dehqonobod” temir yo‘l oralig‘ida yuk poyezdi nosozlik tufayli to‘xtab qolgani, bu esa “Toshkent—Termiz” hamda “Toshkent—Sariosiyo” poyezdlarining harakat jadvaliga ta’sir etganini, keyinchalik poyezdlar qatnovi tiklanganini ma’lum qilgan.
Izoh (0)