Сурхондарё вилояти ҳокими Тўра Боболов Термиздан Сариосиё станциясигача бўлган 180 километрлик темир йўл атрофларини кўздан кечирди. Ҳоким вилоятдаги тегишли туман раҳбарлари, мутасадди идоралар масъуллари ҳамроҳлигида поездда юриб, ушбу ҳудудлардаги ободонлаштириш ишлари билан танишган. Бу ҳақда Сурхондарё вилояти ҳокимлиги матбуот хизмати хабар берди.
Хабарга кўра, Тўра Боболов темир йўл ўтган ҳудудларни айланиш чоғида кўзга ташланган камчиликларни бартараф қилиш ва тартибга келтириш юзасидан масъул раҳбарларга топшириқлар берган.
Шунингдек, темир йўл атрофида фаолият олиб бораётган корхоналар, вилоят аҳолиси истиқомат қиладиган уйлар ҳолати ҳам ўрганилган, биноларни тартибга келтириш, уларнинг ташқи кўринишини замонавий талаблар асосида таъмирлаш тавсия қилинган.
2 декабрь, душанба куни «Тошкент—Термиз» йўналишида ҳаракатланаётган поезд тўхтаб қолиб, йўловчилар ўнлаб автобусларда ташилган. «Ўзбекистон темир йўллари» АЖ ижтимоий тармоқларда тарқалган видео юзасидан расмий изоҳ берган ва «Жарқудуқ—Деҳқонобод» темир йўл оралиғида юк поезди носозлик туфайли тўхтаб қолгани, бу эса «Тошкент—Термиз» ҳамда «Тошкент—Сариосиё» поездларининг ҳаракат жадвалига таъсир этганини, кейинчалик поездлар қатнови тикланганини маълум қилган.
Изоҳ (0)