So‘nggi vaqtlarda ayrim turfirmalar soxta Umra vizasini rasmiylashtirib, Saudiya Arabistoni viza nizomiga zid ravishda O‘zbekiston fuqarolarini mazkur mamlakatga kiritishga urinmoqda. Bu haqda O‘zA xabar berdi.
Ma’lum qilinishicha, 26-noyabr, seshanba kuni Andijon viloyatida joylashgan turistik firmalardan biri tomonidan Jidda shahriga jo‘natilgan 14 nafar o‘zbekistonlikning vizasi qalbaki bo‘lib chiqqan.
Ushbu turfirma 14 nafar ziyoratchiga qalbaki vizalarni rasmiylashtirgan va Saudiya Arabistoniga yuborgan. Saudiya Arabistoni chegara xizmatining ma’lum qilishicha, ularning vizasi bekor qilinib, mamlakatga kiritilmasdan deportatsiya qilingan.
O‘zbekistonning Jidda shahridagi Bosh konsulxonasi va “O‘zbekiston havo yo‘llari” AKning Saudiya Arabistonidagi vakillari bilan hamkorlikda holat yuzasidan barcha zaruriy tashkiliy tadbirlar amalga oshirilib, 27-noyabr, chorshanba kuni “Jidda—Toshkent” reysi bilan yuqoridagi 14 nafar fuqaro O‘zbekistonga qaytarilgan.
Izoh (0)