O‘zbekiston Respublikasi Markaziy saylov komissiyasi raisining o‘rinbosari Mahmud Istamov 2019-yil 22-dekabrdagi saylovlar uchun ilk bor mamlakat miqyosida saylovchilarning yagona elektron ro‘yxati va saylov jarayonini boshqarish axborot tizimi amalda qo‘llanilayotgani haqida axborot berdi. Bu haqda MSK saytida ma’lum qilindi.
Xabar berilishicha, saylovchining qaysi saylov uchastkasi bo‘yicha (doimiy yoki vaqtincha propiska joyi bo‘yicha) saylovchilar ro‘yxatiga kiritilishi uchastka saylov komissiyasi o‘tkazadigan uyma-uy yurish natijalariga ko‘ra aniqlanadi.
Saylov uchastkasi hududida vaqtinchalik yashayotgan fuqarolar bo‘lsa, ularning ovoz berish kuni ushbu hududda bo‘lishi yoki bo‘lmasligi o‘zaro suhbat chog‘ida uchastka saylov komissiyasi a’zosi tomonidan aniqlanadi va saylovchini vaqtincha yashab turgan joyi bo‘yicha saylovchilar ro‘yxatiga kiritish masalasi hal etiladi.
Saylov uchastkasi hududida vaqtinchalik yashayotgan fuqarolar bilan shaxsan suhbat qurish imkoniyati bo‘lmasa, ular vaqtincha yashash joyidagi saylov uchastkasi saylovchilar ro‘yxatiga kiritilmaydi.
Agar saylovchi yashab turgan joyi bo‘yicha hisobga olingan bo‘lmasa (propiskada turmasa), vaqtincha yashash joyidagi saylov uchastkasi bo‘yicha saylovchilar ro‘yxatiga kiritilishi va ovoz berishi mumkin.
Bunda saylovchi yashab turgan joyidagi saylov uchastkasi bo‘yicha ro‘yxatga kiritilishi uchun shu hududdagi uchastka saylov komissiyasiga saylovga kamida uch kun qolgunga qadar (19-dekabrgacha) murojaat qilishi mumkin.
Bunda fuqarodan haqiqatan saylov uchastkasi joylashgan hududda vaqtincha yashayotganligini qo‘shimcha hujjatlar (vaqtincha yashash ma’lumotnomasi va boshqalar) bilan tasdiqlashni talab qilishga yo‘l qo‘yilmaydi.
Murojaatdan so‘ng uchastka saylov komissiyasi fuqaroning shaxsini tasdiqlovchi hujjati asosida saylovchining qaysi saylov uchastkasi bo‘yicha ro‘yxatga kiritilganligini saylovchilarning yagona elektron ro‘yxatidan izlab topadi va muddatidan oldin ovoz bergan yoki bermaganligini aniqlaydi. Muddatidan oldin ovoz berish huquqidan foydalanmagan saylovchilargina vaqtincha yashash joyidagi saylov uchastkasi bo‘yicha saylovchilar ro‘yxatiga kiritilishi mumkin.
Izoh (0)