Sog‘liqni saqlash vazirligi tomonidan O‘zbekiston davlat konservatoriyasida 3-dekabr — Xalqaro nogironlar kuniga bag‘ishlab o‘tkazilgan tadbirda nogironligi bo‘lgan shaxslarning huquq va manfaatlarini himoya qilish yo‘nalishida olib borilayotgan chora-tadbirlar va istiqboldagi vazifalarga alohida urg‘u berildi. Bu haqda vazirlik tomonidan xabar berildi.
Unda O‘zbekiston bosh vaziri o‘rinbosari Aziz Abduhakimov, sog‘liqni saqlash vaziri o‘rinbosari Abduhakim Hojiboyev, O‘zbekiston Nogironlar jamiyatining raisi Komil Abdullayev so‘zga chiqib, ishtirokchilarni bayram bilan tabrikladi.
Qayd etilishicha, so‘nggi uch yil mobaynida respublikada keksalar, nogironligi bo‘lgan shaxslar va imkoniyati cheklangan bolalarga tibbiy-ijtimoiy xizmat ko‘rsatish yo‘nalishida keng qamrovli islohotlar amalga oshirildi.
Xususan, nogironligi bo‘lgan shaxslarga qulaylik yaratish uchun jamoat transporti panduslar, alohida joylar bilan, bekatlar va marshrutlarni eshittiruvchi, elektron ma’lumotli tablolar kabi maxsus vositalar bilan jihozlanadi. Shuningdek, ushbu yo‘nalishda kadrlar tayyorlashga, ilm-fanni rivojlantirishga ham alohida e’tibor qaratilmoqda. Jumladan, Toshkent vrachlar malakasini oshirish instituti negizida birinchi marta ijtimoiy tibbiyot kafedrasi tashkil etildi.
O‘zbekiston Prezidentining 2018-yil 20-iyundagi “Protez-ortopediya buyumlari va reabilitatsiya texnik vositalari ishlab chiqarilishini rivojlantirish hamda tibbiy-ijtimoiy muassasalarining moddiy-texnika bazasini yanada mustahkamlash chora-tadbirlari to‘g‘risida”gi qarori doirasida birinchi marta tizimdagi tibbiy-ijtimoiy muassasalarni yangidan qurish, rekonstruksiya qilish ishlariga qariyb 389 milliard so‘m mablag‘ ajratildi va bu borada amaliy ishlar olib borilmoqda.
Tadbirda 540 nafar nogironligi bor bolaga zamonaviy, yengil konstruksiyali qulay bo‘lgan nogironlik aravachalari tarqatildi. Ta’kidlanishicha, 3-dekabr — Xalqaro nogironlar kuni munosabati bilan joriy yilning 30-noyabridan 30-dekabriga qadar mehr-muruvvat oyligi o‘tkazilmoqda. Unda nogironligi bo‘lgan shaxslarni har taraflama qo‘llab-quvvatlashga qaratilgan keng qamrovli tadbirlarni amalga oshirish ko‘zda tutilgan.
Izoh (0)