Yaponiya sobiq bosh vaziri Yasuxiro Nakasone 101 yoshida olamdan ko‘z yumdi. Bu haqda Yaponiya liberal-demokratik partiyasiga asoslanib Kyodo nashri xabar bergan.
Yasuxiro Nakasone Yaponiya hukumatidagi faoliyatini 1959-yilda boshlagan. U mudofaa vaziri hamda transport vaziri lavozimlarida faoliyat olib borgan. 1982—1987-yillarda Nakasone Yaponiya bosh vaziri sifatida hukumatni boshqargan. U hukumat rahbari bo‘lgan vaqtida mamlakat mudofaasini mustahkamlash va davlat kompaniyalarini xususiylashtirishga e’tibor qaratgan.
Nakasone Ikkinchi jahon urushidan keyin 1910—1945-yillarda yaponlar istilo qilgan Janubiy Koreyaga safar qilgan birinchi bosh vazir edi. Nakasone AQSh prezidenti Ronald Reygan bilan yaqin do‘st bo‘lgan, ikki siyosatchi bir-biriga mos ravishda Ron va Yasu deb murojaat qilgan. Bosh vazirlik vaqtida Yasu Sobiq Ittifoq davlati prezidenti Mixail Gorbachyov bilan ham uchrashgan.
Shuningdek, u 50 yildan ortiq vaqt davomida Yaponiya parlamenti deputati sifatida faoliyat olib borgan. 1947-yilda ilk bor saylangan Nakasone 2003-yilda siyosatni butunlay tark etgan.
Izoh (0)