Япония собиқ бош вазири Ясухиро Накасонэ 101 ёшида оламдан кўз юмди. Бу ҳақда Япония либерал-демократик партиясига асосланиб Kyodo нашри хабар берган.
Ясухиро Накасонэ Япония ҳукуматидаги фаолиятини 1959 йилда бошлаган. У мудофаа вазири ҳамда транспорт вазири лавозимларида фаолият олиб борган. 1982—1987 йилларда Накасонэ Япония бош вазири сифатида ҳукуматни бошқарган. У ҳукумат раҳбари бўлган вақтида мамлакат мудофаасини мустаҳкамлаш ва давлат компанияларини хусусийлаштиришга эътибор қаратган.
Накасонэ Иккинчи жаҳон урушидан кейин 1910—1945 йилларда японлар истило қилган Жанубий Кореяга сафар қилган биринчи бош вазир эди. Накасонэ АҚШ президенти Рональд Рейган билан яқин дўст бўлган, икки сиёсатчи бир-бирига мос равишда Рон ва Ясу деб мурожаат қилган. Бош вазирлик вақтида Ясу Собиқ Иттифоқ давлати президенти Михаил Горбачёв билан ҳам учрашган.
Шунингдек, у 50 йилдан ортиқ вақт давомида Япония парламенти депутати сифатида фаолият олиб борган. 1947 йилда илк бор сайланган Накасонэ 2003 йилда сиёсатни бутунлай тарк этган.
Изоҳ (0)