27-noyabr kuni Toshkentda TV orqali jonli efirda ko‘rsatilayotgan saylov debati elektr o‘chgani sabab uzilib qolgani hamda metroning “G‘afur G‘ulom”, “Alisher Navoiy” va “O‘zbekiston” bekatlarida qisqa muddatli uzilish yuz bergani haqida xabar berilgan edi. “Hududiy elektr tarmoqlari” AJ matbuot xizmati elektr ta’minotidagi ushbu uzilishlarga batafsil tushuntirish berdi.
Qayd etilishicha, Shayxontohur tumanida joylashgan 35 kV “Shayxontohur” podstansiyadagi yuqori kuchlanishli “Shayxontohur-1” yo‘nalishli kabel tarmog‘i shikastlanishi natijasida uzilishlar sodir bo‘lgan.
Xususan, Xalqaro press-klubning Markaziy saylov komissiyasining Shayxontohur tumanida joylashgan matbuot markazidagi efirga uzatilgan press-konferensiyasi vaqtida elektr ta’minotida 5—7 daqiqalik uzilish sabablari o‘rganilganda matbuot markazini elektr energiyasi bilan ta’minlovchi 10 kVli fider “ATS-1” o‘chgan vaqtda fider “ATS-2” kuchlanish ostida bo‘lganligi, matbuot markazining AQU (avtomatik qayta ulash) qurilmasi ishlamasligi oqibatida avtomatik qayta ulash sodir bo‘lmaganligi aniqlandi. Shu sababli tez fursatda bu vazifa texnik guruh tomonidan qo‘lda amalga oshirilgan.
Shuningdek, bundan sal avval Toshkent metrosining “O‘zbekiston” yo‘nalishidagi bir nechta bekatlarida yoritish uskunalarida nosozlik hamda eskalatorlar to‘xtab qolganligi to‘g‘risida ma’lumot berilgan.
Ma’lum qilinganidek, ushbu uzilish 35 kV “Shayxontohur” podstansiyadagi yuqori kuchlanishli “Shayxontohur-1” yo‘nalishli kabel tarmog‘i shikastlanishi natijasida vujudga kelib, metropolitenda zaxiradagi kabel shu zahoti avtomatik ravishda zaxiradagi kabel tarmog‘iga ulangan va muammo bartaraf etilgan. Qayd etish joizki, metropolitenda elektr ta’minoti uzilishi emas, tarmoqdagi kuchlanishning pasayishi holati yuz bergan.
“Kechagi holatlar shuni ko‘rsatdiki, iste’molchilar tasarrufida bo‘lgan binolardagi elektrotexnik qurilmalar sozligini o‘z vaqtida ko‘rikdan o‘tkazish, nosozliklar aniqlanganda muammoni bartaraf etish yuzasidan joylardagi elektrotexnik xodimlar tomonidan zarur choralar ko‘rish bo‘yicha alohida mas’uliyat talab qilinadi”, — deyiladi xabarda.
Ma’lumot uchun, Xalqaro press-klubning 27-noyabr kuni Markaziy saylov komissiyasining Toshkent shahar Shayxontohur tumanida joylashgan Xalqaro matbuot markazida tashkil etilgan navbatdagi jonli efir orqali efirga uzatilayotgan press-konferensiyasi vaqtida elektr ta’minotida uzilish yuz berib, tadbir ishtirokchilari taxminan 5—7 daqiqa davomida chiroqsiz qolib ketgan. Xalqaro press-klub bosh prodyuseri G‘ulom Samadov ushbu holatga quyidagicha munosabat bildirgan:
“Fikrimcha, Toshkent shahridagi elektr ta’minotiga mas’ul rahbarlar saylovlar jarayoni ketayotganini, saylov jarayonlari boshlanganini sezishi kerak. 20-sentabrdan beri Markaziy saylov komissiyasi Xalqaro matbuot markazida Xalqaro press-klub to‘g‘ridan to‘g‘ri efirga chiqyapti, mas’ullarning bundan xabari bor. Ular jonli efirni ko‘ryapti, “Yoshlar” radiokanali orqali tinglayapti.
Tadbir joyini muqobil energiya yoki boshqa zaxira bilan ta’minlashga ular mas’ul bo‘lishi kerak. Biz ularga elektr energiya bilan ta’minlab berishlarini so‘rab rasman murojaat qilmaganmiz. Shunday bo‘lsa-da, mutasaddilar mas’uliyatni his qilishi kerak. Bugun kuzatilgan elektr ta’minotidagi uzilish haqida ular bizni ogohlantirmagan. Buni energetika tizimining saylov jarayonlariga, umuman, siyosiy voqealarga munosabati, deyish mumkin”.
Izoh (0)