Soliq kodeksining 164-moddasiga asosan korxonalar har chorakning birinchi oyi 10-sanasigacha ushbu chorakda kutilayotgan foydasi va to‘laydigan foyda solig‘i to‘g‘risidagi ma’lumotnomani ro‘yxatdan o‘tgan davlat soliq inspeksiyasiga taqdim etishi kerak. Bu haqda DSQ matbuot xizmati eslatmoqda.
Ushbu ma’lumotnomaga asosan soliq bazasi miqdori 44,7 million so‘mdan yuqori bo‘lgan xo‘jalik subyektlari to‘laydigan soliq summasining 1/3 qismini har oyning 10–sanasigacha avans tariqasida amalga oshirish majburiyatiga ega.
Bunday majburiyat bugungi kunda respublika bo‘yicha 9241 to‘lovchilarda mavjud. Ushbu soliq to‘lovchilarning 8671 tasi yoki 94 foizi majburiyatlarini qonunda belgilangan tarzda o‘z muddatida bajarib kelmoqda.
Shu bilan birga, 6 foiz yoki 570 ta soliq to‘lovchi 2019-yil IV choragi uchun foyda solig‘i joriy to‘lov ma’lumotnomasida soliq summasini o‘tgan choraklarga nisbatan kamaytirib ko‘rsatgan yoki umuman ko‘rsatmagan.
Bu o‘z navbatida, ishlab chiqarish umuman to‘xtatildi yoki tovarlar realizatsiya qilinmayapti degani. Aslida, tahlillarga ko‘ra, bunday holatlar tasdig‘ini topmasdan ushbu korxonalar o‘z faoliyatini davom ettirmoqda.
Masalan, Andijon viloyatidagi “Vodiy gavhari” korxonasi (nomi o‘zgartirilgan) joriy yilning II choragida 170,2 million so‘m foyda solig‘i to‘lagan bo‘lsa, III chorak joriy to‘lovlari (avans) uchun 12,0 million so‘m to‘lashi to‘g‘risida ma’lumotnoma bergan yoki II chorakka nisbatan o‘rtacha 158 million so‘mga (170—12) kam ko‘rsatgan.
Natijada III chorak uchun kamaytirib ko‘rsatilgan joriy to‘lov summasining 1/3 qismiga iyul, avgust va sentabr oylari uchun 5,5 million so‘m penya hisoblandi.
Toshkent shahridagi “Yuksak qurilish” korxonasi (nomi o‘zgartirilgan) joriy yilning II choragida 215 million so‘m foyda solig‘i to‘lagan bo‘lsa, III chorak joriy to‘lovlari (avans) uchun bergan ma’lumotnomasida to‘lanadigan soliq summasini nol ko‘rsatgan.
Natijada III chorak uchun joriy to‘lov amalga oshirilmaganligi hisobiga korxonaga nisbatan kechiktirilgan kunlar uchun 7,3 million so‘m penya hisoblandi.
Shu kabi korxonalarga soliq organlari murojaat qilsa, “men folbinmanmi”, “nega kelgusida oladigan foydam uchun soliq to‘lashim kerak” kabi asossiz e’tirozlarni ham bildirayotgan holatlar mavjud.
“Hurmatli soliq to‘lovchilar! Ortiqcha harajatlarni oldini olishingiz uchun IV chorak foyda solig‘i joriy to‘lov ma’lumotnomasini aniqlashtirgan holda qayta ko‘rib chiqishingiz maqsadga muvofiq bo‘ladi. Shu bilan birga, ayrim soliq organlari tomonidan budjetga muddati kelmagan soliq to‘lovlari asossiz talab qilinayotgan bo‘lsa, bunday talabni bajarmasligingiz va bu to‘g‘risida Davlat soliq qo‘mitasining Ishonch telefoniga (71–244-98-98) zudlik bilan murojaat qilishingizni so‘raymiz”, — deyiladi xabarda.
Izoh (0)