27 ноябрь куни Тошкентда ТВ орқали жонли эфирда кўрсатилаётган сайлов дебати электр ўчгани сабаб узилиб қолгани ҳамда метронинг «Ғафур Ғулом», «Алишер Навоий» ва «Ўзбекистон» бекатларида қисқа муддатли узилиш юз бергани ҳақида хабар берилган эди. «Ҳудудий электр тармоқлари» АЖ матбуот хизмати электр таъминотидаги ушбу узилишларга батафсил тушунтириш берди.
Қайд этилишича, Шайхонтоҳур туманида жойлашган 35 кВ «Шайхонтоҳур» подстанциядаги юқори кучланишли «Шайхонтоҳур-1» йўналишли кабел тармоғи шикастланиши натижасида узилишлар содир бўлган.
Хусусан, Халқаро пресс-клубнинг Марказий сайлов комиссиясининг Шайхонтоҳур туманида жойлашган матбуот марказидаги эфирга узатилган пресс-конференцияси вақтида электр таъминотида 5—7 дақиқалик узилиш сабаблари ўрганилганда матбуот марказини электр энергияси билан таъминловчи 10 кВли фидер «АЦ-1» ўчган вақтда фидер «АЦ-2» кучланиш остида бўлганлиги, матбуот марказининг AQU (автоматик қайта улаш) қурилмаси ишламаслиги оқибатида автоматик қайта улаш содир бўлмаганлиги аниқланди. Шу сабабли тез фурсатда бу вазифа техник гуруҳ томонидан қўлда амалга оширилган.
Шунингдек, бундан сал аввал Тошкент метросининг «Ўзбекистон» йўналишидаги бир нечта бекатларида ёритиш ускуналарида носозлик ҳамда эскалаторлар тўхтаб қолганлиги тўғрисида маълумот берилган.
Маълум қилинганидек, ушбу узилиш 35 кВ «Шайхонтоҳур» подстанциядаги юқори кучланишли «Шайхонтоҳур-1» йўналишли кабел тармоғи шикастланиши натижасида вужудга келиб, метрополитенда захирадаги кабел шу заҳоти автоматик равишда захирадаги кабел тармоғига уланган ва муаммо бартараф этилган. Қайд этиш жоизки, метрополитенда электр таъминоти узилиши эмас, тармоқдаги кучланишнинг пасайиши ҳолати юз берган.
«Кечаги ҳолатлар шуни кўрсатдики, истеъмолчилар тасарруфида бўлган бинолардаги электротехник қурилмалар созлигини ўз вақтида кўрикдан ўтказиш, носозликлар аниқланганда муаммони бартараф этиш юзасидан жойлардаги электротехник ходимлар томонидан зарур чоралар кўриш бўйича алоҳида масъулият талаб қилинади», — дейилади хабарда.
Маълумот учун, Халқаро пресс-клубнинг 27 ноябрь куни Марказий сайлов комиссиясининг Тошкент шаҳар Шайхонтоҳур туманида жойлашган Халқаро матбуот марказида ташкил этилган навбатдаги жонли эфир орқали эфирга узатилаётган пресс-конференцияси вақтида электр таъминотида узилиш юз бериб, тадбир иштирокчилари тахминан 5—7 дақиқа давомида чироқсиз қолиб кетган. Халқаро пресс-клуб бош продюсери Ғулом Самадов ушбу ҳолатга қуйидагича муносабат билдирган:
«Фикримча, Тошкент шаҳридаги электр таъминотига масъул раҳбарлар сайловлар жараёни кетаётганини, сайлов жараёнлари бошланганини сезиши керак. 20 сентябрдан бери Марказий сайлов комиссияси Халқаро матбуот марказида Халқаро пресс-клуб тўғридан тўғри эфирга чиқяпти, масъулларнинг бундан хабари бор. Улар жонли эфирни кўряпти, «Ёшлар» радиоканали орқали тинглаяпти.
Тадбир жойини муқобил энергия ёки бошқа захира билан таъминлашга улар масъул бўлиши керак. Биз уларга электр энергия билан таъминлаб беришларини сўраб расман мурожаат қилмаганмиз. Шундай бўлса-да, мутасаддилар масъулиятни ҳис қилиши керак. Бугун кузатилган электр таъминотидаги узилиш ҳақида улар бизни огоҳлантирмаган. Буни энергетика тизимининг сайлов жараёнларига, умуман, сиёсий воқеаларга муносабати, дейиш мумкин».
Изоҳ (0)