Toshkent shahridagi asosiy Yangi yil archasini bezash ishlari boshlangani haqida xabar berilgan edi. Toshkent shahar hokimligi mazkur jarayon aks etgan videoni taqdim etdi.
Ma’lum qilinishicha, o‘tgan yilgi archa uchun foydalanilgan bezaklar yaxshi saqlangani uchun joriy yil ham ana shu bezaklardan foydalanilmoqda. 25 mingta rang-barang bezak osilgan bir metrli shoxlar 36 metrli temir konstruksiyaga qo‘l mehnati bilan ilib chiqilmoqda.
Mutaxassislar ish shu zaylda davom etsa, archa ikki kunda tayyor bo‘lishini ta’kidlamoqda. Ayni paytda 10 nafar alpinist maxsus texnika yordamida archani bezash ishlarini olib bormoqda.Shuningdek, Istiqlol ko‘chasining bayram tomoshalari bo‘lib o‘tadigan qismini bezatish ishlari ham olib borilmoqda. Bayram tadbirlari uchun ikkita sahna tayyorlanmoqda. Attraksionlar va savdo do‘konlari o‘rnatilmoqda. Asosiy archaning to‘rtta tomonida selfi ixlosmandlari uchun kichik archalar o‘rnatiladi.
Toshkentda birinchilardan bo‘lib bezatilgan bayram archasi Tashkent City xiyobonida o‘rnatilgan. Archaning balandligi 24 metrni tashkil qiladi. Bayram arafasida xiyobonda estrada vakillarining konsertlari, shokolad, pittsa va pishloq festivallari va bayram karnavallari bo‘lib o‘tadi.
Izoh (0)