Farg‘onada millatchilik avjiga chiqqani, ko‘rlar jamiyatida korrupsiya borligi haqidagi xabarlarga XTB munosabat bildirdi

Ijtimoiy tarmoqlarda 25-noyabr, dushanba kuni tarqalgan “Farg‘onada millatchilik avjiga chiqdimi? Ko‘rlar jamiyati ichida korrupsiya bormi?” nomli videolavha yuzasidan Farg‘ona viloyati xalq ta’limi boshqarmasi munosabat bildirdi.

Qayd etilishcha, ushbu videolavhada viloyat ko‘zi ojiz bolalar uchun ixtisoslashgan maktab-internatining sobiq o‘quv ishlari bo‘yicha direktor o‘rinbosari nohaq ishdan bo‘shatilganligi atilgan. Holat viloyat xalq ta’limi boshqarmasi tomonidan o‘rganib chiqilganda yuqoridagi vajlar o‘z tasdig‘ini topmagan.

Mazkur videolavhadagi holatlar haqida haqqoniy o‘rganishlar jarayonida mazkur maktab-internati direktori tomonidan hech qanday bosim o‘tkazilmaganligi hamda xodimlar va o‘qituvchi-pedagoglar orasida biror marta bo‘lsa-da, millatchilik kayfiyati bo‘lmagan.

“Biz Farg‘ona viloyati xalq ta’limi boshqarmasi mutasaddilari mazkur shikoyat yuzasidan tomonlarning fikrlarini xolisona o‘rgandik. Lekin millatchilik kayfiyati xususida hech qanday alomatlar ko‘rinishini topmadik. Shikoyatchining videochiqishida bunday so‘zlar aslo ishlatilmagan”, — deyiladi xabarda.

Shuningdek, ko‘zi ojiz bolalar uchun ixtisoslashgan maktab-internatining sobiq o‘quv ishlari bo‘yicha direktor o‘rinbosari “nohaq ishdan bo‘shatilganligi” da’vo qilinib yoki lavozimga qayta tiklanish maqsadida ushbu chiqishni tashkil etgani ma’lum bo‘lgan.